Bym khot ïakren u CM ïa ka FASToM, mynta rai ban sah miet ki nonghikai Adhoc ha surok

Shillong, Jymmang, 11: Ki nongïalam jong ka Federation of All School Teachers of Meghalaya (FASToM) ha ka sngi Balang ki la shim ïa ka rai ban pynlong da ka jingïakhih paidbah kham jur shuh shuh shuh hadien ba u Myntri Rangbah ka Jylla u Conrad Kongkal Sangma u la mynthi ban khot ïakren ïa ki nongïalam ban ïathir ïatai halor ka jingdawa kaba ki ladep pynsngew hakhmat ka Sorkar.
Ha ka Lah Sngi u Blei mynta ka taiew, ki nongïalam ka FASToM ki la ieng hakhmat ka khyrdop jong ka Main Secretariat ryngkat bad ka jingthoh, ‘Ngi kwah ban ïakynduh bad u Myntri Rangbah ka Jylla u Conrad Sangma.”
Haduh mynta ka FASToM ka la pynjur ïa ka jingïakhih ban dawa ïa ka Sorkar Meghalaya Democratic Alliance (MDA) ban kyntiew kyrdan Deficit System/Deficit Pattern hynrei na ka liang jong u Myntri ka tnat Pule Puthi ka Sorkar Jylla u Bah Lahkmen Rymbui u la ong ba ka Sorkar kan ym lah satia ban kyntiew kyrdan Deficit System/Deficit Pattern ïa ki nonghikai skul Adhoc namabar ka Sorkar ka don hapdeng ka jinghiran ka Pla Tyngka.
Dang shen ki nongïalam ka FASToM ha ka jingïakynduh ïa u Commissioner & Secretary ka tnat Pule Puthi ka Sorkar Jylla u Dr. BDR Tiwari ki la aiti ïa ka dorkhas ba la tyrwa ban kyntiew da ka tulop kaba T.18 hajar ïa ki nonghikai skul Adhoc haduh ka kyrdan Lower Primary haduh Higher Secondary bad ka jingpynkiew tulop kaba 5% manla u snem.
Dei halor kane ka nongrim ba ki nongïalam jong ka FASToM ki la phah ïa ka shithi sha ka Ophis jong u Myntri Rangbah ban panpor na ka bynta ban ïakynduh hynrei haduh kine ki sngi u Myntri Rangbah ka Jylla u Conrad Kongkal Sangma u la mynthi bad aidaw ba um lah satia ban ïakynduh ïa ki.
Kane ka jingkiar jong u Myntri Rangbah ka la pynbitar ïa ki nongïalam jong ka FASToM bad mynta ka sngi Balang ki la pynbna ban pynlong da ka jingïakhih paidbah ban leit tur sha Main Secretariat ha ka por 12:30 baje nohsngi.
“Wat lada ngi dei ban sahmiet ha surok ruh kam leilei hynrei ngin ap beit haduh ba u Myntri Rangbah ka Jylla un da khot ïakren ïa ngi khnang ban ïashai kaei ka rai kaba ka Sorkar kan shim ha kaba ïadei bad ka jingtyrwa kaba ngi ladep tyrwa sha ka Sorkar,” ong u nongaitktien ka FASToM ha ka jingïakren bad ki lad pathai khubor ha ka sngi Balang.
“Kane ka jingïakhih jong ngi kan long kaba jaijai bad lada don mano mano ki riewshim kabu ngin kyntu beit ïa ki bor jong ka aiñ ban kem beit mardor,” u la ong.
U Myntri Rangbah ka Jylla u Conrad Sangma ha ka sngi Baar ula ong ba ka Sorkar ka dang bishar ïa ki jingdawa jong ki nonghikai skul Adhoc bad ïathuh ruh ba un sa khot jingïalang ïa ka tnat Pla Tyngka ka Sorkar Jylla khnang ban ïathir ïatai sani halor kane ka jingdawa kaba lada ka Sorkar kan ai jingmynjur ban pynkiew tulop ïa ka tulop ka jinglut kan kot da ki spah klur.
Ka jingpynlut pisa haba siew tulop sha ki nonghikai skul Adhoc ha ka shi snem ka long T.145 klur hynrei lada kynthup lang ïa ka jingpynkiew tulop kaba T.18 hajar ka Sorkar Jylla kan hap ban bei ïa ka jingpynlut pisa sa kumba T.13 klur shi bnai bad T.156 klur shi snem.