Ym shym wan khynra ka ED ha MeECL halor ka Saubhagya scheme ong u Dy CM

Shillong, Jymmang 11: U Symbud Myntri Rangbah ka Jylla Bah Prestone Tynsong uba dei khmih ïa ka Tnad Power, ula kyntait ïa ka jingmih khubor ba wan khynra bad kurup ka Tnad Enforcement Directorate ïa ki kot ki sla jong ka Saubhagya Scheme hapoh ka Ophis Mehalaya Energy Corporation Limited (MeECL).
Hynrei u Symbud Myntri Rangbah ula kubur ba ka Tnad Enforcement Directorate jong ka Sorkar Pdeng, kala pan ïa ki jingtip na ka MeECL halor ka rukom pyntreikam ïa kane ka skhim sam bording sha ki shnong ki thaw ka Jylla naduh u snem 2021.
“Ka jingpynmih khubor (ha kawei ka kot khubor phareng) ba wan khynra ka ED ha MeECL ka dei kaba bakla, ka bym dei bad ka bym don nongrim satia haei haei ruh” ong u Symbud Myntri Rangbah haba ïakren bad ki lad pathai khubor haba bynrap “Ngim lah ban pdiang ïa kane ka khubor ka ba khlem da pynthikna bha”.
U Bah Prestone u pyntip ba uwei u Nongthoh khubor jong kane ka kot khubor phareng ula ïoh ïakren ruh bad u Chairman-cum- Managing Director ka MeECL hynnin ka miet uba la pyntip ba kam shym don satia ka jingkhynra lane ka jingkurup ïa ki kot ki sla jong ka Saubhagya Scheme.
Haba kylli, u Bah Prestone u pyntip “Ha ka jingshisha, kala don ka jingphah shithi na ka ED ha u bnai Risaw-Naiwieng 2021 ba pan ïa ki jingpynshai, ïa ki jingtip bad ki kot ki sla na ka MeECL halor ka Saubhagya. Ka MeECL kala dep ban aiti lut ïa baroh ki kot ki sla ba donkam kynthup ka kaiphod CAG”.
“Dang mynshisngi, ka Tnad MeECL kala phah biang ïa ki katto katne ki kot ki sla ba pan da ka ED” ula bynrap.
Haba kylli ïa kum kiei kita ki jingpynshai ba don jingartatien da ka ED halor ka Saubhagya Scheme, u Symbud Myntri Rangbah ula ong “Ïa mynta hi ngam pat lah ban batai bniah hynrei ka Tnad MeECL kala ai lut ïa ki kot ki sla ba pan da ka ED la ka dei ka Tender Documents, Tender Agreement ne kano kano. Ngam lah ban ong ïa mynta ba kaei kaba pynlong ïa ka ED ban pan ïa kine ki kot ki sla hynrei ngi la pyndep ïala ka jong ka kam bad ieh mynta ha ka ED”.
“Ïa kaei kaba ki pan, ngi la dep ban ai lut bad mynta ka shong ha ki ban bishar ïa kine ki kot ki sla”. ong u Bah Prestone haba bynrap “Kino kino ki Agency haba ki ïohpdiang ïa ki jingujor, ki ju phah shithi sha ki Tnad ba dei khmih ban pan jingpynshai ba kin nang ngam jylliew ïa ka kam”.
Halor ka jingtohkit jong ka Inquiry Commission ïa ki jingkynnoh bamsap hapoh MeECL kynthup ïa ka skhim Saubhagya, u Symbud Myntri Rangbah ula pyntip ba ka Commission kala dep aiti ïa ka kaiphod sha ka Sorkar Jylla lyngba ka Tnad Political bad kane ka Tnad ka dang shong bishar ïa ka kaiphod.
“Nga tharai ba shen ka Tnad Political kan sa phah noh ïa kane ka kaiphod jingtohkit sha ka Tnad Power” ula ong.