Shillong, Jymmang, 11: Uwei u rangbah bar jylla ïa uba la tip kyrteng kum u Shubankar Dev uba la 46 snem ka rta uba shong basah ha Rynjah, Shillong u la duhei ïa la ka jingim ha ka jingjia aksiden ha ka sngi Baar ha ka por 11:00baje mynmiet.
Kane ka la jia hadien ba kawei ka kali Bolero Pick-up kaba don ïa u number ML04 B 3857 ka la leit tynrah ïa kawei ka Scooty kaba don ïa u Number ML 05 S 0953 bad ha kane ka jingjia u nongniah jong ka Scooty u la khlad hashen bad ka pyrsa jong u ka Debolina Dev kaba pule ha Meghalaya Police Public School (MPPS) kaba shong lang ha kane ka Scooty ka la mynsaw jur.
Ïa ka Debolina Dev kaba la mynsaw jur la pynkit noh mar mar sha Shillong Civil Hospital ban ïoh ïa ka jingsumar.
Katkum ka khubor na ki Pulit, la ïathuh ba kane ka la jia na ka daw ba kane ka kali Bolero Pick-Up ka la wan ïaid na ka lynti ka bym dei ban ïaid na ki bynta jong ka Governor House bad ynda la poi ha ki bynta jong ka surok hakhmat ka ophis Main Secretariat u nongniah jong ka Bolero u la leit tynrah beit beit ïa ka Scooty kaba wan pyrshah.
Halor kane ka jingjia na ka liang jong ki Pulit ki dang pynlong ïa ka jingtohkit kaba bniah bad la ïathuh ruh ba u nongniah jong ka kali Bolero ruh u la mynsaw.
