Shillong, Jymmang, 11: Ka Hynñiewtrep Youths Council (HYC) , Seng kmie ka dap da ka jingsngewsih ban ïohi ïa ka jingleh sting jong ka Sorkar Jylla ïa ka jingdawa ba shongnia jong ki nonghikai skul Ad-hoc hapoh ka jingïalam jong ka Federation of All School Teachers of Meghalaya (FASTOM).
Ka HYC ka sngew ban pynpaw ba ki nonghikai ki dei ki nongtei ri bad ki dei ki briew kiba saiñdur ïa ka jaidbynriew, ïa ka Jylla bad ïa ka Ri hi baroh kawei. “Ngi ïohi ba ki ka pule puthi ha Meghalaya ka la kiew namar ka jingdon ki nongseng skul kiba kylluid mynsiem bad kiba don ka mynsiem ban kyntiew ïa ka imlang sahlang kum ki Niam, ki Balang, ki Hima, Raid, Shnong bad ki Riewshimet. Haba pynshong nongrim janai ngi lap ba ka dei ka jinglen lade jong ki nonghikai pat kaba pynlong ïa kine ki skul Ad-hoc ba kin kiew bad kin roi. Dei ki nonghikai kiba shah jynjar ban shim ka tulop ba rit khang ba kine ki skul Ad-hoc kin kiew ha ki liang baroh,” ong u kyrwoh ba la phah da u President u Bah Robert June Kharjahrin.
“Ka jingkylli kaba ngi kwah ban kylli na ka Sorkar Meghalaya ka long, haduh katno kine ki nonghikai skul Ad-hoc ki hap ban shah shitom? Hato kam dei ka kamram ka Sorkar ban siew kylliang ïa ka jingshah shitom jong ki? Ka dor jong ki mar ki mata, ka bai wai ing, ka bai leit bai wan bad kiwei ki jingdonkam ki kiew jan manla u bnai, hato ym dei ban kyntiew ïa ka tulop ki nonghikai Ad-hoc ar ne lai sien ha ka san snem,” la buh jingkylli ka Seng.
“Ka HYC ka kyrshan tylli tyllan ïa ka jingdawa ka Federation of All School Teachers of Meghalaya (FASTOM). Ngi dawa na ka Sorkar ba ka dei ruh ban pyni da ka burom babha ïa ki nonghikai bad ki dei ban khot ïakren ïa ki nonghikai bad khamtam eh ka Sorkar ka dei ban sngap bad pynurlong ïa ki mat jingdawa kiba shongnia jong ki nonghikai skul Ad-hoc lyngba ka FASTOM,” ong une nongïalam ka Seng.
