Shillong, Jymmang 11 : Ka National People’s Party (NPP) ha ka sngi Balang ka la pynphai nia kylla da ka ong ba kum ka party hi kam sngew ïahap satia ïa ka jingkren laplah bad ka jingkynnoh da ki katto katne ki nongïalam jong ka UDP haba ïadei bad ka jingtreikam jong ka NPP.
“Kino kino kiba ong, kyrmen ba shwa ban kren ki dei ban da tip ïa ki kyndon kiba donkam ban bud katkum ka Riti Synshar jong ka Ri. Balei nga ong kumta, ka sorkar Assam kam lah ban wanrah pisa ha ka jylla Meghalaya bad ka sorkar Meghalaya ruh kam lah satia ban shim noh ïa ka pisa ba la mang ban leit ai sha Manipur ne sha kiwei ki jylla jong ka thaiñ shatei lam-mihngi jong ka Ri,” ong u National Vice President ka NPP Bah Prestone Tynsong uba dei ruh u Symbud Myntri Rangbah ka Jylla haba kren bad ki lad pathai khubor.
U ong ruh ba tang namar mynta u dei u snem elekshon, ki paidbah kim dei satia ban kren tangba la ïoh ban kren. “Hynrei nga shu ong tang katne ba ka nongrim treikam jongngi kadei kaba shai bha ba ngin ym kren tangba la ïoh kren halor ki ishu. Kiwei ki party ki pyrshang ban kynthoh ïa ka NPP ba baroh ka khajna na ka sorkar Meghalaya la rah lut sha kiwei ki jylla jong ka thaiñ shatei lam-mihngi jong ka ri kaba long ka jingkynnoh ka bym don nongrim ei ei ruh.” u la bynrap shuh shuh.
Ha kajuh ka por u ong pat ba ki nongïalam jong kiwei ki party haba kren ha ki jingïalang paidbah ki lah ban shu bakla kren ym ba ki da mut shisha ban kren kumta. “Haduh mynta ka sorkar MDA ka skhem bad ngi burom iwei ïa iwei pat ïa baroh ki party kiba don ha ka sorkar synrop bad ngin ym ailad ba kan don ka jingkynthoh iwei ïa iwei pat,” u la bynrap biang.
U Bah Prestone u la ïathuh ruh ba na ka liang ka NPP ka la dep bthah ïa baroh la ka long ïa ki kyrtong lane ïa ki nongïalam party ba kin kiar na kaba kynthoh ym tang ïa ki party kiba donlang ha ka sorkar hynrei wat ïa ki party kiba don ha ka Liang Pyrshah ruh. U ong ruh ba donkam ban sngewthuh ba haba kren dei ban kren beit ïa ka jingshisha ym ban kren da kumwei pat.
