Shillong, Risaw 24: Ki jylla hapoh ka ri India naduh ka 2 tarik haduh ka 31 tarik u Risaw ka la rakhe ïa ka ‘Khadi Mahotsav’ halor ka phang pdeng “Khadi for Nation, Khadi for Fashion” da ka jingthmu ban kyntiew ïa ka Khadi & Village Industries, Handloom & Handicraft, ODOP bad ki tiar ki tar kiba la pynmih da ki karkhana rit kiba don ha kylleng jong kane ka ri.
Ka jingthmu jong katei ka prokram ka long ban kyntiew ïa ki tiar ki tar kiba la shna bad pynmih da ki karkhana rit bad kiwei kiwei lyngba ka “Vocal for Local” Campaign bad ‘Atma Nirbhar Bharat Abhiyan’ kumba la ïohi jngai da u Myntri Rangabhduh ka ri.
Ha kaba ïadei bad kane, na ka liang ka State Office jongka Khadi & Village Industries Commission, Shillong (Meghalaya) ka la pynlong ïa ki prokram ki bapher kum ka Seminar, Khadi Yatra, Khadi Charcha & Khadi Pledge ha Gandhi Buniyadi Secondary School, Pynthorumkhrah, Shillong ha ka 18 tarik u Risaw ïa kaba la wan ban iashim bynta da bun ngut ki khynnah skul.
Ha katei ka jingialang u Mange Ram, State Director, Khadi & Village Industries Commission, Shillong ula ai jingbatai halor ki Schemes bapher jongka KVIC bad ula ïakren ruh bad ki khynnah skul ha kaba ïadei bad ka Khadi Charcha.
Ha katei ka jingïakren, ki khynnah skul kila buh ki jingkylli bad kila ïoh ruh ïa ki jubab bad ïa ki nuksa halor ki jingkylli kiba ki la buh.
Kila don 90 ngut ki khynnah skul kynthup ïa ki bor pynïaid skul jongka Gandhi Buniyadi School kiba la ïashim bynta ha ka Khadi Yatra.
