Shillong, Jymmang 11: U Symbud Myntri Rangbah ka Jylla Bah Prestone Tynsong hynne ka sngi balang ula pynpaw ïa ka jingkyrmen ba u Myntri Rangbah ka Jylla Conrad Kongal Sangma, un sa lum ïa ka jingïalang ban ïakren halor ka jingeh ki paidbah na ka jingkiew dor ki umphniang (petrol/diesel) bad ruh ka LPG Cylinder.
Haba pyntip ba ka jingkiew dor ka Umphniang ka dei ka jingeh ym ba mad tang ka Jylla ne ka Ri India hynrei ka pyrthei baroh kawei, u Symbud Myntri Rangbah ula ong “Ngan sa shong ïakren bad u Myntri Rangbah ban pyrkhat ïa kane ka kam bad ngin peit kumno ba ngin leh ha kaban weng ïa ka jingeh ki paidbah”.
U Bah Prestone ula ong ba ka jingshim rai ïa kane ka kam ka dei ruh ka kam jong baroh ki Jylla bad kumjuh ka Sorkar Pdeng.
“Nga kyrmen ba u Myntri Rangbah un sa lum ïa ka jingïalang halor kine ki jingeh bad ngin sa shim ïa ka rai kumno ban leh” ula ong.
Haba kylli ïa ki daw, u Bah Prestone ula ong “Baroh ngi iatip ba ka thma Ukraine-Russia ka dei ka daw ka jing kiew dor ka Umphniang. Kane kala khah ïa ka pyrthei baroh kawei ym tang ka Ri India.”
