Shillong, Jymmang 11 : Ka sorkar jylla haduh mynta kan ym pat lah ban weng noh ïa ka jingpynlip bording kaba shi kynta man ka sngi namar ka jingduna hap u slap.
“Lada biang ka jinghap slap lehse, khamtam kumba phi tip ha pung Umïam mynta ka jingdon ka um ka la duna shaba palat . Kumta donkam ba ka um ha katei ka pung kan kiew sha u laiñ ba ka um kadei ban poi sa tang kata hi kaba ngi lah ban weng ïa ka jingpynlip bording,” ong u Symbud Myntri Rangbah ba dei peit artad ïa ka tnad Bording, Bah Prestone Tynsong haba kren hadien ka jingïalang jong ka party.
Shwa kane, u Symbud Myntri Rangbah u la pyntip ruh ba la nang pynduna ïa ka jingpynlip bording bad mynta ki don sa tang katto katne tylli ki jaka ba dang ngat ha katei ka jingshah pynlip bording kata ruh tang shi kynta.
“Kumta, na ka liang jongngi ngin pyrshang ïa kaba bha tam ban pynduna bad wat ban weng noh syndon ïa ka jingpynlip bording,” u la bynrap shuh shuh.
