Phah thawlad ka SPB ïa ka tnat Home, PWD bad Urban ba jur ka dheng kali ha Shillong

Shillong, Risaw 18 : Ka Meghalaya State Planning Board ha ka sngi Balang kala kyntu ïa ka tnad Kampohïing ka jylla, Transport nangta ïa ka tnad PWD bad ruh ïa ka tnad Urban Affairs ba kin ai jingmut bad wad ki lad ki lynti khnang ba yn lah ban weng ïa ka dheng kali kaba jur ha nongbah Shillong. Haba kren bad ki lad pathai khubor hadien ka jingïalang jong ka MSPB, u Chairman ka Board, Bah Metbah Lyngdoh u la ong ki tnad bapher bapher jong ka sorkar jylla ki la ïatai sani bha haba ïadei bad katei ka dheng kali kaba baroh ki kynduh jingeh lut .
“Ka bynta kaba kine ki tnad ka long ba kin ai jingmut kumno ban leh ban wad ïa ki lad ki lynti khnang ba ngin lait noh na kane ka dheng kali,” ong u Bah Metbah da kaba bynrap ba na ka liang ka Board ka khlem buh por ïa kitei ki tnad ba kin phah ïa ki jingai jingmut hynrei la shu bthah ïa kitei ki saw tylli ki tnad sorkar ba kin pyrshang pynstet kham kloi.
La ïathuh ba ha katei ka jingïalang la shim ruh ïa ka rai ban khot ïa ka tnad Bording ban ai jingmut halor ka rukom pynpoi bording sha ki paidbah ka jylla.
U Chairman u la ïathuh ruh ba ki tnad sorkar kiba poi sha katei ka jingïalang ki kynthup naduh ki heh sorkar ka tnad Kampohing, PWD, PHE, Transport, Urban Affairs, Agriculture, Power, Water Resources, ka tnat Soil, Fisheries nalor kiwei kiwei.
La ïathuh ruh ba ka Board kan sa khot biang ïa ka jingïalang ban peit ïa ki jingai jingmut na ki tnad bapher bapher khnang ba kin lah ban tip kumno ban ïaid shakhmat ïa ka kam.