Shillong, Risaw, 18: Ka Naga Students’ Union (NSU) Shillong, ka Angami Elders’ Forum (AEF) Shillong, ka Angami Students Union (ASU), Shillong, bad ka NEHU Students’ Union kynthup ruh ka Naga Students of NEHU (NSNEHU) ki la shahniah beit ha ka jingtohkit jong ki Pulit ka Tura Police Station ïa ka jingshah pynlaw lyngkhuit jong uwei u samla pule dang shen hapoh ka hostel jong ka NEHU Campus, Tura.
Ha ka jingïalang ba la don lang da ki nongmihkhmat na ka North-Eastern Hill University (NEHU), ba kynthup ïa u Prof. S.R. Joshi, u Registrar, ka Prof. Lucy Zehol, u Chairman jong ka Fact Finding Committee la bynshet ban tohkit ïa katei ka jingjia ha NEHU Tura Campus.
Kine ki kynhun ki la pynpaw ïa ka jingsngewkhia halor ka jingbym poi jong u Vice Chancellor ka NEHU sha ka jingïalang, watla u Lat ka Jylla u la bthah ban shong jingïalang kyrkieh halor kane ka jingjia.
Ha ka jingïalang, la pyntip ba u Vice Chancellor u ladep mudui da ka ejahar ha Tura Police Station ha ka 14 tarik mynta u bnai, bad kitei ki kynhun ki la aiti beit ïa ka jingshaniah ha ki bor jong ka aiñ ban shim ïa ka jingkitkhlieh da kaba pynlong ïa ka jingtohkit kaba bniah halor ka jingjia ba dang shen.
Kane ka jingshimkhia jong ki bor pynïaid ka skulbah ka dei kawei na ki mat jingdawa ba la pynsngew da ka Naga Students’ Union (NSU) Shillong ha ka 11 tarik mynta u bnai.
Halor ka jingkyrpad jong ka NSUS, ka Angami Elders’ Forum Shillong, ka Angami Students Union Shillong, ka NEHU Students’ Union, bad ka Naga Students of NEHU, lai tylli ki jingthoh yn aiti da ka NEHU da ki bahaing hasem jong u samla pule uba la kylla long u lanot lane sha ki nongmihkhmat jong u.
Ki lai tylli ki jingthoh ki long, ka kopi jong ka ejahar ba la ujor da u Vice Chancellor sha ki Pulit ka Tura ha ka 14 tarik, mynta u bnai, ka kopi jong ka kaiphod ba la lum da ka Internal Fact Finding Committee halor kane ka jingjia bad ka jingkular jong u Vice Chancellor ka NEHU ban shim ïa ki lad ki lynti, ban pyrkhing mardor ïa kino kino ki kam pohdor ba pynisaitmet da kaba pyntreikam ïa ka UGC Anti-Ragging Laws, bad ka jingpyntip lano ki Pulit kin ai ïa ka kaiphod tohkit.
Kitei ki kynhun ki la pynpaw ruh ba ki don ka jingshaniah ha ki Pulit jong ka Tura Police Station bad ha ki bor pynïaid jong ka skulbah NEHU khnang ba ka kynhun kaba donkti ban leh ïa ki kam be-aiñ ki dei ban ngat ha ki kyndon ba tyngeh jong ka aiñ.
Ki la kyrpad ruh ïa ki bor pynïaid jong ka NEHU bad ïa ki Pulit ka Tura ba kin pynstet ha kaba tohkit ïa kane ka jingjia khnang ban pynïoh kham kloi ïa ka hok jong u lanot.
