Shillong, Risaw, 18: Ki nonghikai jong ki skul Deficit kiba la shongthait na ka kam hikai skul kiba la thaw ïa ka shatri Meghalaya Retired Deficit School Teachers Association (MRDSTA) ha ka sngi Balang ki la aiti da ka jingthoh ha u Myntri Rangbah ka Jylla u Conrad Kongkal Sangma ban buddien halor ka jingdawa ïa ka baibam tymmen ne Pension kaba ki dei ban ïoh katkum ba la mynjur da ka 5th Pay Commission.
Ha ka jingïakren bad ki lad pathai khubor u President jong ka Association u Bah E.D Nongsiang u la ïathuh ba ki don kumba 2000 ngut ki nonghikai jong ki skul Deficit ha ka Jylla baroh kawei, kata na rilum Khasi, Jaiñtia bad na rilum Garo kiba la shongthait na ka kam bad kiba ap khmih lynti ban ïoh ïa ka baibam tymmen na ka Sorkar kaba kim pat ïoh satia haduh mynta mynne.
U Bah Nongsiang u la ïathuh ba kane ka jingdawa ban ïoh ïa ka baibam tymmen ka la kynjoh mynta la kumba 50 snem hynrei haduh mynta ka Sorkar Jylla kam pat shim ïa kano kano ka sienjam ban pyllait ïa ka song pisa.
“Jan baroh ki Jylla ki siew ïa ka baibam tymmen sha ki nonghikai skul hynre ha ka jylla Meghalaya la pynduh ïa ki nonghikai skul ba la shongthait ban ïoh ïa kane ka jingmyntoi,” ong u Bah Nongsiang.
“Ka jingdawa ban ïoh ïa ka baibam tymmen ka dei kaba la slem bad ka don ruh ka jingkular na ka Sorkar ban siew ïa ka baibam tymmen hynrei haduh mynta kam pat leh eiei. Ngi la aiti biang da ka jingthoh kum ka jingpynkynmaw ïa u Myntri Rangbah,” u la ong.
U Myntri Rangbah u la pyntip sha ki nongïalam ka Association ba un sa khot ïa ki ophisar jong ka tnat Pule Puthi ban ïathir ïatai sani halor ka jingsiew baibam tymmen sha ki nonghikai skul Deficit.
Haba kylli, u la ong, “ka jingdawa ka dei kaba la don la jan sanphew snem lane shwa jong kata. Ngi ruh ha kine ki 20-30 snem ngi la ïai dawa shi dawa naduh ka por ba ngi dang shakri kum ki nonghikai ruh ngi la dawa hynrei kam poi shano shano ruh. Mynta ngi la shongthait bad ngim ïoh eiei shuh na ka Sorkar. Lada u Myntri Rangbah u sngewsynei lem ïa ngi ki nonghikai, lehse un sa leh eiei na ka bynta jong ngi kumba u la kular ba un sa khot ïathir ïatai shwa ïa ki ophisar.
Ha kane ka jingïakynduh ïa u Myntri Rangbah ki don ruh ki nonghikai skul Deficit kiba la shongthait kiba la wan khnang na rilum Garo ban pynsngew ïa kane ka jingdawa hakhmat jong u Myntri Rangbah.
