Plie u Myntri ka tnat ka Koit ka Khiah ka Sorkar Pdeng ïa ki jingshakri ba thymmai ha NEIGRIHMS

Shillong, Risaw 14 : U Myntri ka tnad ka Koit ka Khiah jong ka sorkar pdeng, u U Mansukh Mandaviya ha ka sngi Saitjain u la plie paidbah ïa ka Regional Cancer Centre, Under Graduate Medical College ki ba thymmai, ka building ba thymmai jong ka Nursing College, ki Hostel, ka Modular OT bad Guest House ba thymmai ha North Eastern Indira Gandhi Regional Institute of Health and Medical Sciences (NEIGRIHMS) Shillong.
Ha kane kajuh ka sngi u Myntri u la buh ruh ïa u maw nongrim jong ka Critical Care Block kaba don 150 tylli ki jingthiah nongpang jong kane ka jaka ai jingsumar. La donlang ruh ha kane ka sngi naduh u MLA ka thaiñ kumjuh u Prof. Nalin Mehta, Director, NEIGRIHMS nalor kiwei kiwei.
Ha ka jingai jingkren jong u ha kane ka sngi, u Dr Mandaviya u la ong, “Kine ki jingshakri ba plie thymmai kin pynbiang ïa ki jingdonkam ha ka jingai jingshakri ha ka koit ka khiah ïa ki briew ka thain shatei lammihngi. Ka Sorkar Pdeng ka ieng skhem ban kyntiew ïa ki jingdon jingem ha ki kam ai jingsumar ha ka thain shateilam mihngi bad ban ai ka jingshakri kaba bha ha ki jingsumar ïa ki briew jong ka thain.”
U Myntri Sorkar Pdeng u la ong ruh ba kine ki jingdon jingem ba thymmai ha NEIGRIHMS kin ïarap ban wanrah bad pynneh ïa ki riewshemphang ha ki kam ai jingsumar ha ka thain shatei lammihngi. U la ïaroh ïa ka rukom treikam bad ka jingkhuid ha NEIGRIHMS.
U la ong ruh ba ka Sorkar ka ieng skhem ban kyntiew shuh shuh ïa ki jingdon jingem ha NEIGRIHMS khnang ba kane ka jaka ka sah kum ka jaka pdeng na ka bynta ka jingai jingsumar, ka jingwad bniah bad ka jingai jinghikai ïa kito kiba trei ha ki kam ai jingsumar na ka bynta ka thain shatei lammihngi.
U Dr Mandaviya u la ong ba ka Sorkar India ka peit ïa ki kam ai jingsumar ha ka rukom kaba pura. “Ngim tei tang ïa ki jingdon jingem katkum ka juk mynta ha ki kam ai jingsumar. Ngi la kyntiew ruh ïa ka jingdon ki doktor ki nurse. Ha kine ki khyndai snem ba la dep, ka jingdon ki medical college ka la kiew arshah ha ka ri. Ngi la tei 1,70,000 tylli ki Health & Wellness Centre ha kylleng ka ri. Ngi dang tei ruh kawei ka Critical Care unit ha man ka distrik jong ka ri”, u la ong.
U Prof Nalin Mehta u la ong ba kine ki jingdon jingem kiba thymmai kin kyntiew ïa ki jingai jingshakri ha ka jingsumar ha NEIGRIHMS bad kan kyntiew ïa ka jingdon ki seat pule MBBS bad B.Sc. Nursing ha Meghalaya. U la ong ruh ba lyngba ka jingkyntiew ïa ki jingshakri ha ki kam ai jingsumar ha ka thain shatei lammihngi, ki briew kin lait na ka jinghapleitjngai sha kiwei kiwei ki bynta jong ri na ka bynta ki jingsumar.
La ïathuh ba kine ki jingdon jingem ba thymmai kin pynbiang ïa ki jingdonkam jong ki briew ka thain shatei lammihngi. Ka Regional Cancer Centre ka dei kaba don 252 tylli ki jingthiah nongpang kaba ai ki jingsumar jingpang cancer ba pura ïa ki nongpang na kylleng ka thain. Ka Under-Graduate Medical College kan ïarap ban ai jinghikai under graduate medical ïa 100 ngut ki samla pule MBBS man u snem da kaba pyndonkam ïa ki teknoloji katkum ka juk mynta. Ka Nursing College kan ai jinghikai ïa ki nurse ban pyndap ïa ka jingdonkam ka thain ïa kito kiba la tbit ha ki kam nurse. Ki hostel ki don 416 tylli ki kamra bad kan pynbiang jaka sah ïa ki samla pule MBBS & ki Intern.
Ka Modular OT ka dei ka operating theatre kaba katkum ka juk mynta ha ka hospital bad yn pyndonkam ïa kane na ka bynta ki jingpuid kiba jynjar. Ka guest house kaba thymmai ka don 28 tylli ki kamra ban pynbiang jaka sah ïa kiba shah khot sngewbha bad kito kiba wan peit ïa ka NEIGRIHMS.
Ka bynta kaba kongsan jong kine ki jingdon jingem ba thymmai ka dei ka lad virtual autopsy ha kane ka jaka kaba long kawei na kiba bha tam bad kaba don ha tang katto katne ki centre ha ka ri. Ka virtual autopsy ka dei ka rukom peit ïa ki met ïap kaba pyndonkam ïa ka medical imaging technology ban shna ïa ka 3D model jong ka met bad lah ban peit ïa kane da ki forensic pathologist bad kiwei kiwei ki riewshemphang ha ki kam ai jingsumar.
Dang tei ïa ka Critical Care Block kaba don 150 tylli ki jingthiah nongpang hapoh ka PradhanMantri – Ayushman Bharat Health Infrastructure Mission (PM-ABHIM) ban ai jingsumar ïa kito kiba ïoh ïa ki jingpang kiba ïabit kum ka COVID-19. Kane kan pynthikna ba ka hospital baroh kawei kan ym shah ktah haba don kum kine ki jingpang.