Nongstoiñ, Jymmang 10: Kumba mar shiteng ei ei na ki khynnah nongkyndong ha West Khasi Hills haduh kine ki sngi, ki dang im bad pynlut ïa ka por jong ki ha ki lum ba jyrngam bad ki pyntha phlang ryngkat ki masi ki blang khlem jingkhuslai. Ha ka jinglong ba shisur, ka jingim jong ki ka dei ka jingim kaba sngew tynnad tam na ki por baroh.
Ha kine ki sngi ha ka jingjurip jong u Mawphor ia ka jinglong jingman jong ki nongshong shnong ha ki nongkyndong, la lap ba palat mar shiteng na ki shnong hapoh ka District ki dang ialeh ban pynneh pynsah ïa ka kam ri jingri kum ki masi, ki blang, ki syiar bad ki sñiang na ka bynta ban kyrshan ïa ki ïing ki sem bad ban kyntiew ïa ka ïoh ka kot ka jong ki.
La lap ruh ba ha ki nongkyndong, ka jingmyntoi ba ki ïoh na ki jingri kum ki masi ki blang bad ki sñiang, kam dei tang namar ki pynmih pisa hynrei ka eit kaba ki pynkylla sboh ban thung bad ban rep ban riang ka dei kaba kongsan tam.
Haba twad jingmut na kiba bun ki nongshong shnong, ki la ïathuh ba na ka bynta ban sumar ïa ki jingri kum ki masi ki blang, ki khun kiba dang hapoh 14 snem ki dei ki nong sumar ban ri bad ban ap ïa ki ha ka por mynsngi. Nalorkata ki la ïathuh ba na ka bynta ban pynnang pynstad ïa ki khun pat, ki hap ban phah skul mynstep bad watla bun na ki khynnah ki dei kiba pynlut ïa ka por jong ki ha kaba sharai ïa ki jingri ruh, hynrei ym don uwei ruh u bym leit skul. Hadien ba ki la dep ïa ka klass kaba saw ha L.P Skul ki la hap ban pynsangeh noh ba kin leit sharai masi sha lum.
Ki la ong ruh ba watla ki khun ki kti jong ki, ki dei kiba im ban ki jingri jingdup ruh, hynrei yn da ki la poi sha ki klass kiba kham shaneng kim dei satia kiba duna ha ka jingpule bad ki don ruh shibun ki khynnah kiba ia ryngkat ka jingnang jingstad bad kiwei pat ki khynnah kiba im ha ki jaka sor.
Kawei ka longkmie ka la ong ba wat la ki khun jong ka ki im ban sharai masi shalum hapdeng ka jingshit kyrang jong ka sngi ha ka por pyrem bad ka jingther jong u slap ha ka por lyiur ruh, kim ju ïoh pang wat shisien ruh. Ha baroh shi aïom bad ha ka por janmiet mar shu dep set ïa ki masi ha sem, ki minot thop ban khreh kot kumba la bthah da ki nonghikai.
Ka la ong ruh ba ka sngew sarong ba ki khun jong ka, ki im ki san ha ryngkat ka jing sain dur ka mariang. Ka la ong ruh ba ynda ki la heh la san bad ki la pyndep ïa ka jingpule jong ki, kin sa sngewthuh kumno ban ñiewkor ïa ka jingkordor jong ka mariang bad ka jingdonkam ban pynneh pynsah kumba ka long.
