Shillong, Risaw 4: Hadien ka jingwad kaba la bun bun sngi ïa ki arngut ki samla kiba la jah rngai na la ïing jong ki kata u Samla Wanboklang Kurbah bad ka Samla Phibankyntiew Sun kiba la phet na ïing naduh ka 20 tarik Nailur 2023 hynnin ka sngi la lap ïa ka met ka Samla Phibankyntiew bad ha ka sngi Balang pat la lap sa ïa ka met u samla Wanboklang.
Ïa ka met u Samla Wanboklang la lap na kawei ka thwei ba la tip kum ka Wei Tdem.
Hadien ba ki pulit Search and Rescue Team ki la ïoh ban sei ïa ka met u Samla Wanboklang na ka liang ki trai ïing ki la kyrpad ïa ki bor pulit ban pynlait noh na ka jingleh post mortem namar kat kum ka jingïakren bad ka kmie jong u ka la pynpaw ba kam sngew donkam ban leh ïa ka post mortem namar kam don kano kano ka jingtharai sniew ba don ba pynïap dusmon ïa u hynrei ki sngew skhem ba u noh ïap hi ha kane ka riat.
“Namar ngi dang ap ïa ka hymmen jong u kaba dang wan phai na Goa ngi la rai kum ka ïing ba ka jingleit ontep kan long ha ka sngi Palei jong ka 5 tarik Risaw,” ong ka kmie jong u samla Wanboklang bad ka la ïathuh ruh ba yn pyndep ïa ka jingleh ñiam kaba khatduh ha ïing sah jong u ha Traw Saitkhlieh.
Lah ban kdew ba ha tmier jong kane ka riat la lap ïa ki dak ki shin kaba ka samla Phibankyntiew Sun bad u Samla Wanboklang ki la ieh shadien kata ka kopi ba don ka kyrteng jong ka Phibankyntiew, ka ïit khmat bad la lap ruh ïa u ksai juti.
Ha ka jingïakren bad u Diocesean Youth Director (DYD) jong ka Shillong Archdiocese uba dei ruh u Principal jong ka St Paul’s Higher Secondary School, Marbisu u Father Jimris Shylla u la ïathuh ba ha ka jingshisha kine ki arngut ki samla ki dei kiba ym don kano kano ka dak sniew ha skul bad ki long ruh ki khynnah kiba smat ba sting.
“Ka long kaba sngew kyndit namar kine ki khynnah skul ki dei kiba smat ba sting bad kiba shim bynta bha ha kino kino ki program jong ka skul bad ka Samla Phibankyntiew dang ha ka Teachers’ Day ba la dep ka shim bynta ha kawei na ki program bad u Samla Wanboklang ruh ha ka jingleit khmih thuh ïa ka rukom shong dorbar ha Khasi Hills Autonomous District Council ha ka jingïakren bad ki MDC u la ïeng ban buh jingkylli na kata ka daw ban pyrkhat ba kaba kum kane ka jingjia kan wan lap ka dei kaei kaei kaba kyndit haduh katta katta,” u la ong.
Shuh shuh na ka liang jong u u la kyntu ïa ki samla ba kim dei ban long kiba pyrkhat kut lad ha kino kino ki jingeh kiba ki ïa kynduh ha ka jingim namar ki jingeh bad diengpyngkiang kim dei kiba kut jong ka jingim.
“Ha ka jingim kum ki samla kin don bun ki jingeh ba ngi ïa kynduh hynrei ngim dei ban shim ba ki dei kiba kut jong ka jingim bad ïa ka jingeh ba kum ki samla ngi ïakynduh ngi dei ban pan jingmut bad jingïarap na kiba la san kiba ngi lah ban shaniah la ki dei ki kmie ki kpa ne ki nonghikai ne ki paralok ruh khnang ba kin lah ban kdew jingmut lem, bad nga kwah ban kyntu ba kum ki samla ngi dei ban long kiba shaniah ha U Blei ha man ki khyllipmat ka jingim,” kyntu u Phadar Jimris Shylla.
