Pyllait paidbah u MLA ka Mawkynrew ïa ka Ambulance na bynta ki 7 shnong

0

Shillong, Jymmang 9 : U MLA ka Mawkynrew Constituency uba long ruh u Myntri ka tnad kam rep kam riang bad sport jongka jylla u bah Banteidor Lyngdoh mynta ka sngi ula pyllait paidbah sa kawei ka Ambulance hapoh ka Constituency ha ka jingïalang ba la pynlong ha Mawlat khnang ba kan ai ka jingshakri na ka bynta ki Hynniew tylli ki shnong kiba don hapoh ka Raid Mawlat.
Ha kane ka jingpyllait paidbah la ïadon lang ki khlieh nongsynshar shnong kata naduh u Sorbar ka Raid Mawlat bah Sailon Kongjoh, i Dr I Syiem ba dei peit ïa ka Mawkynrew PHC, Chairman ka Synjuk Rangbah Shnong Raid Mawlat bah Moron Suting, ki Sordar jong ki Hynniew Shnong, u President ka PDF Mawkynrew Circle bah Andra Rynjah, Secretary PDF Mawkynrew Circle Bah Dengbok Kurkalang, ki Riew Rangbah bad ki paidbah jong katei ka thaiñ.
Ha ka jingkren ki Rangbah ba la pynpaw haneng ki la ai ka jingïaroh bad jingsngewnguh ïa u MLA uba la pynurlong ïa ka jingthrang jongki kaba la slem bah namar la bun ki nongmihkhmat ki la pan ïa ka Ambulance hynrei ym don ba sngap ïa kane ka jingeh ba ki paidah ki ïakynduh khamtam haba hap ban kit ïa ki nongpang sha ki hospital hynrei mynta da kane ka jingïarap ba sbun mynsiem jong u MLA ka thaiñ ka la ïoh ka jingkyrkhu kaba khraw ban shakri ïa ki paidbah kiba donkam ka jingiarap ha ka pang ka shitom. Nalor kata ki riew rangbah ki pynpaw ruh ka jingshaniah ha u nongmihkhmat jongki ba un dang lah shuh shuh ban ban ai ka jingshakri hok ïa ki.
Nalor ba la noh synniang ïa kane ka Ambulance u MLA ula ai jingïarap ruh ïa ki longïing kiba duk bad kito kiba don ki jingduna ha ki dkhot met jongki ha kane hi ka jingïalang mynta ka sngi.
Na ka liang u MLA bad Myntri sorkar u bah Banteidor haba kren ha ka jingïalang u la ong “ Nga la ai shaphi ïa kane ka ambulance khnang ba phin ïoh ban pyndonkam ïa ka haba kit ïa ki nongpang sha ki jaka ai jingsumar. Kumta phi dei ban shim ïa ka kum ka kali jongphi da kaba phin sumar bha ïa ka bad khamtam eh ban ym pyndonkam bakla ïa ka. Nga shim khia ban sngap ïa ka jingeh jongphi namar nga buh ïa ka jingkoit jingkhiah kum ka bynta ha ka jingshakri jong nga ïaphi ki paidbah namar lada biang ka jingkoit jingkhiah kata hi ka long ka spah kaba khraw tam ha ka jingim ki briew”.
Hadien kane u MLA u la leit jurip ruh ïaka Sub Centre kaba don ha Mawlat ha ka jingïadon lang u Sordar Shnong bad i Dr Syiem. Ha ka jingleit jurip u la lap ba ki don bun ki jingduna ha kane ka Sub Centre bad na ka liang jong u MLA u la rai ban shim khia ïa kane ka kam ban rah sha ki bor kiba dei peit ïa ka koit ka khiah khnang ba kin shim khia ban pynbha noh ïa kane ka Sub Centre.

Leave A Reply

Your email address will not be published.