Wanrah ka Sorkar da ka jor u Ongole ban pynkharoi ïa ki masi ha Jylla

0

Shillong, Jymmang 09: Ka Tnad Animal Husbandry & Veterinary kala wanrah mynta da ka jor (semen) jong u muit Ongole ban pynkharoi ïa ki masi ha Jylla khnang ba ka Jylla kan pahuh ïa ki masi shohdoh bad khem dud.
Ïa kane la pyntip da u Principal Secretary ka Tnad Animal Husbandry & Veterinary u GHP Raju haba ïathuh ba kane ka dei ka Indo-Danish Project (IDP) jong ka Artificial Insemination Programme hapoh jong ka Rashtriya Gukul Mission.
Une u Heh Ophisar u pyntip ba ka jingdon jong ki masi ha Jylla ka long kumba 9 lak tylli bad haduh 60% na ka jingdon masi ban shoh doh ha Jylla ka dei kaba wan na shabar ka Jylla.
“Ka Tnad kala wanrah haduh 6 tylli ki miut Ongole ban pyrshang pyniashongkha bad ki masi ba don ha Jylla khnang ba kin kha roi bha bad ban pynkiew ruh ïa ka jingshoh doh” ong u Raju haba pyntip ba ka Tnad kala dep leh haduh 65000 tylli ki Artificial Insemination (jinginjek jor) ha ka masi kynthei ka Jylla.
U Raju u ïathuh ba ka Tnad kala thied haduh 2000 tylli ki semen straw (jor bala thep ha ki kynja pipe plastic barit) bad kala dep leh ruh ïa ka pilot project da kaba injek ha ki masi kynthei na Jylla kiba la kha haduh 60 tylli ki masi khun.
“Ka Tnad ka don jingthmu ban injek haduh 5 lak ki masi da kaba pyndonkam ïa ki jor u muit Ongole khnang ban lah pynmih shibun ki masi shoh doh” ula ong.
Kum shibynta ban pynïaid shakhmat ïa ka jinginjek jor u muit ongole, ka Tnad kan ai jingiarap ïa ki nongri masi haduh T. 2.57 klur ban injek haduh 2.57 lak tylli ki masi bad 100 tyngka kum ka bai sumar ïa kawei ka masi.
U Raju u pyntip ba ka Tnad kala thied ruh haduh 13000 tylli ki jor bala jied kyrpang ki ban pynthikna ha kaban ïoh ïa ki khun masi kumba kwah la ki dei ki khun kynthei ne shynrang.
Ha kajuh ka por, une u Heh Ophisar u pyntip ba ka Tnad Animal Husbandry & Veterinary ka don haduh 4 tylli ki farm ri masi bad ka ju ai ïa ki khun masi shynrang ne kynthei sha ki nongri masi.
“Ngi kyrmen ba da ka jingwanrah ïa ka jor u muit ongole, ka Jylla kan sa lah ban pyndap hi nalade ïa ka jingdon kam masi ban shoh doh” ula ong.

Leave A Reply

Your email address will not be published.