La pynkut ïa ka rynsan ïakop pyni riam Khasi tynrai ba la pynlong da ka Marynthing – Ka snap paka

0

Shillong, Jymmang :Ka Marynthing – Ka snap paka ha kane ka sngi Saitjaiñ ba la lah ka la pynkut noh ïa ka rynsan ïakop pyni riam Khasi tynrai 2022 ha ka jingdon sakhi u samla Pynshai Rani, Publicity Secretary Khasi Students’ Union (KSU) u ba la ïa don lang kum u kongsan, bah ES Majaw i trai ka Ri Khasi Book Agency kum u symbud kongsan, u samla Shanbor Khongjah uwei na ki nongkitkam bahakhmat ka Seng Khasi Sengraij uba long u nongshah khot kyrpang bad kiwei pat ki nongshah khot sngewbha
Ha katei ka sngi, La sam ruh ïa ki Khusnam sha ki nongjop baroh bad ïa Nongjop ba nyngkong kum ka Lahduh ha ka Jingiakop pyni riam tynrai ka dei ka samla Monalisa Wankhar, kaba lah ïohrah ia ka Khusnam bad ka buskit song pisa kaba 15,000 /- , i nongjop ba ar i dei i Lidaris Lyngdoh Lyngkhoi i ba lah ïohrah ïa ka Khusnam bad ka buskit song pisa kaba 10,000/- bad i nongjop ba lai i dei i heprit Dasanjanai Rani i ba lah ïoh rah ia ka Khusnam bad ka buskit song pisa ba 5000/- nalor kitei ki don sa 10 ngut kiba ïoh ïa ka consolation prize kaba 1000/- marwei.
Ha shwa ban sdang ka jingsam Khusnam lah ïoh ka jingkren lyngkot na u symbud kongsan, Bah ES Majaw u ba la pynpaw ïa ki kyntien kordor kyntien shongsbai kiba ai mynsiem ïa ka marynthing- ka snap paka ïa ka jingpyrshang shitrhem ban trei ïa ki kam babha kiba kyrsiew thiah shisha ïa ka jaitbynriew bad khamtam ïa ka jinglah katei ka kynhun ki samla ban pynlong ïa kane ka rynsan ïakop pyniriam Khasi tynrai 2022 kaba iphuh iphieng.
U Symbud kongsan u la mynsiem ia ki samla ha katei ka sngi ba ki dei ban pynneh ïa la ka jong ka riam Khasi tynrai bad ïala ka jong ka ktien ka thylliej ka akor ka burom bad ban ïaleh na bynta ka hok longtrai jongngi kum ka jaitbynriew da kaba pynpaw ba kum ka jaitbynriew ngi don ïa 3tylli ki bynta ba Kongsan ban pynithuh kyrpang ïa ngi kata ka long ka snam, ka ktien bad ka deiti kolshor.
Kine ki lai tylli ki long kiba khraw bad ba kongsan eh haba u Blei nongbuh nongthaw u lah ai kyrpang hynrei lada ngin husiar bha ngin sa jot namar ki don shibun kiba ap thap ban knieh noh ïa ka hok longtrai jong ngi na kata ka daw ngi dei ban lok kiba adkhar bad phikir bha da kaba sumar sukher bad ban pyneh ïa la ka jong ka riti ka dustur haba ngi ong ngi ieid ïa la ka jong ka Ri.
Katba, na ka liang u samla Pynshai Rani, Publicity Secretary KSU uba long u kongsan ha katei ka sngi u la ong ba ka Marynthing- ka snap paka ka long kawei na ki nuksa kiba bha tam na bynta ban pynneh pynsah bad pyneh rngiew ïa ka riam ka beit bad ki deiti tynrai u Hynñiewtrep Hynñiewskum. U la pynpaw ba na ka liang jong ka seng KSU ruh ki ju pynlong ïa kum kine ki jait rynsan ha ka liang ka rwai ka siaw ka put ka tem bad ka riam ka beit khnang ban kyntiew ïa la ki jong ki paradoh parasnam bad ban pynneh ïala ka thymmei bad ka snap tynrai ba kyrpang jongngi kum ka jaitbynriew, bad u la pynpaw ïa ka jing ai khublei kit bok kit rwiang ïa ki samla nongpynïaid ka Marynthing- ka snap paka ïa ka jingmih shakmat jong ki ban pynneh pynsah ïa ka deiti tynrai u Hynñiewtrep lyngba ka juk teknoloji ban pyntyllun ruh ïa shibun kiei kiei kiba ai jingmyntoi ïa ka jaitbynriew bad khamtam ka jingpynlong ia kum kane ka rynsan ïakop pyni riam Khasi tynrai da kaba ong ba kum ki jait rynsan ki wanrah ka jingmyntoi kaba khraw namar ki nongïashim bynta ki lah ban pyni sarong ïala ka jong ka riam ka beit tynrai na ki dong ki thaiñ bapher bapher kaba pynpaw ïa ka jingriewspah ka riam ka beit jongngi ki Khun Khasi-Khara.
U lah pynkut da kaba ong ba ka jingmih ka marynthing- ka snap Paka ka long shi bynta kum ka kabu ksiar ba ngin ithuh ïa ka ïa ka riam ka beit na kylleng ki shnong ki thaw, ki dong ki thaiñ bad pynpaw sha ka pyrthei ïa ka jingriewspah jong ngi bad khamtam eh ban hikai ïa ki samla ba kin nang ban ieid ban tyngkai ïala ka jong ka Ri Hynñiewtrep ka Jaitbynriew Khasi-Khara.

Leave A Reply

Your email address will not be published.