Shillong, Jymmang :Ka Maitshaphrang ka dap da ka jingsngew sarong ba mynta la lah ban pynmih ïa ka kot shaphang ka “Phan Nonglait,” ba la thoh da u Bah Daniel Stone Lyngdoh, u nongsaid aiñ jong ka Supreme Court u ba la thoh shaphang ki kam shlur jong ka hapoh ka jingïalam jong u Syiem Tirot Sing ha ka jingïakhun pyrshah ïa ki shipai Phareng ki ba thmu ban thombor ïa ka ri jong ngi ha kito ki por
Katkum katei ka kot, ka Phan Nonglait ka la ïa don bynta ha ka jingshah pynïap jong ki 32 ngut ki shipai phareng ha katei ka jingïakhun.
Ka Maitshaphrang lyngba u Bah Michael N.Syiem Convenor ka pynkynmaw ba ryngkat ka jingïatreilang bad ka Seng Samla Jaiaw Laitdom ka la pynïalehkai ïa ka Drama Surok (Street Play) ka ba la ai kyrteng; “Ka Drama jong ka Phan Nonglait,” ha ki ba bun ki kyntoit jong ka sor Shillong bad ha ka shnong Nongkhlaw ha ka snem 1994 bad 1995 ban ïathuh shaphang ki kam shlur jong ka Phan Nonglait sha ka jaidbynriew bad ka pyrthei hi baroh kawei.
Namar mynta la lah ban pynmih syndon da ka kot shaphang ki kam shlur jong ka Phan Nonglait, kumta ruh na ka liang ka Maitshaphrang ka dawa na ka sorkar pdeng bad ka sorkar jylla ba ki dei ban ithuh noh ïa kane ka khlawait jong ka jaidbynriew Hynñiewtrep kum kawei na ki riewshlur jong ka Ri India baroh kawei.
