Shillong, Jymmang :Ha kane ka sngi Saitjaiñ ba la lah ka Seng Congress Mawlai ka la ïoh ban pynskhem ïa ki nongkitkam jong ka Mahila Congress Mawlai ha ka jingïalang ka ba la long hapoh indoor Dorbar hall Iewrynghep.
Ha katei ka sngi la ïa don ryngkat lang naduh u kyrtong ka seng congress bah Marbud Dkhar, ki nongïalam jong ka Mawlai block Congress naduh u President bah M. Hynniewta, Secreatary bah J. Dkhar ryngkat ki dkhot , u secretary incharge jong ka Mawlai jong ka MPCC bah T. Lapang, ki nongïalam jong ka MPYC i kong Lakyntiew Sohkhlet ba bat kum Gen. Secretary .
Ha katei ka sngi la pynïaid ïaka jingïalang da u bah M. Hynniewta President ka block Mawlai bad la ïoh ruh ka jingkren na i kong Lakyntiew Sohkhlet Gen. Secretary MPYC kumjuh na u Bah T. Lapang MPCC incharge Mawlai, bad khatduh na u kyrtong ka seng Congress bah Marbud Dkhar.
Haba ai jingkren na ka liang u Bah Marbud Dkhar , u lah ai khublei ïa ka Women Mahila congress , ba ki la shim khia ban mih shakhmat ban trei na bynta ki kam party ha Mawlai. U lah ong ruh ba ha kane ka kynti, ki longkmie ka Mawlai ki dei ban trei shitom ban shim ha lade ka kamram ban pyn sngewthuh ïa ki marjan marpa, kumno ba ka politics ka ktah ïa ka imlang sahlang lada bakla jied nongïalam, khamtam sha ka dorbar thaw aiñ. Nalor kata u la ong ruh ba na ka daw ka jingbam sap palat bad ka jingpyndonkam bakla ïa ka bor bad ka pisa ha ka por election, kan pynjot thiaw ïa ka Ri bad ka jaitbynriew. U la ong ba ki paidbah ki dei ban kyntait war ban die ïa la ka hok ban jied nongïalam.
U la ong ba na ka daw ka jingbakla ha ka jied sorkar, ki mih ki jingeh laiphew jait kum ba la jia ha ki border area, kiba lah shah die noh sha ka Assam da ki khwan myntoi shimet. Ka Mawlai u pynkynmaw, ba ka dei ka jaka ba ieid jaitbynriew bad da lei lei ruh kam lah ban trei ryngkat kito kiba die ïa ka.
Shuh shuh u la ong ba lada ka Mawlai ka leit, ka jaitbynriew hi kan sa leit lang. Ki jingpynbiej, u lah ong, ki la sdang rung ha Mawlai ha kine ki sngi lyngba ki skim bad ki jingkular bapher bapher, hynrei u la kyntu ban ym biej shuh ïa kum kita. Namar lada kwah shisha ka shynshar khadar ba khuid bad ba shai, ban kiew ka jaitbynriew ryngkat ka jinglaitluid, u paidbah u dei ban stad noh bad ban ai jingsneng ïa ki khwan myntoi.
