Nongstoiñ, Jymmang 9: Ka shad suk mynsiem kaba khatphra, kaba la pynlong da ka Seng Khasi West Khasi Hills ha madan New Nongstoiñ mynta ka sngi, ka la long kaba ishongkun bad kaba iphuh iphieng ha kaba shispah laiphewkhyndai ngut ki rang samla bad shispah khathynñiew ngut ki thei samla sotti na kylleng ki jaka ki la wan ban ïashim bynta.
Ïa katei ka shad suk mynsiem, la sdang naduh hynnin ka sngi ha kaba ki rangbah bad ki nongpynïaid jong ka Seng Khasi ki la pynlong ïa ka jingïakynduh lang ha ka Ïing seng kaba don ha ka kyntoit Spengthawlangmlah New Nongstoiñ, ban pynlong ïa ka nguh ka dem ka duwai ka phirat ha u kynrad Nongbuh Nongthaw bad ka jingleh niam niam katkum ka riti ba la ju leh da ki longshuwa man shuwa.
Ha katei ka jingshad suk mynsiem ki paitbah na kylleng ki jaka ki la wan ban sakhi lang ha ryngkat ki rangbah bad ki longkmie jong ka Seng Khasi. U bah P.Ryntathiang President jong ka Seng Khasi West Khasi Hills, haba ïakren bad ki nongthoh khubor, u la ong ba ha katei ka lympung shad la wan ban ïashimbynta lang da ki rangsamla bad ki thei samla jong ka Seng Khasi Eastern West Khasi Hills.
Ha kane ka sngi, nalor ki paitbah la ïadon ryngkat ruh da u bah Gabriel Wahlang MDC ka Nongstoiñ bad kiwei kiwei ki nongtrei sorkar kiba sah ha Nongstoiñ wat la ka dei ka sngi shuti ruh. Ha kaba pynkut ïa katei ka jingshad, la pynhiar ïa ka lama da u bah D.K Dkhar Deputy Commssioner barim ka West Khasi Hills.
