Nongstoiñ, Jymmang 9: Na ka bynta ban pynmih pisa ban siew ïa ki jinglut jingsep haba don kino kino ki jingïalang ne ki prokram ba kyrpang kiba pynlong ha madan New Nongstoiñ, ki nongpynïaid jong ka shnong, ki VDP bad seng samla shnong New Nongstoiñ, ki la pynlong ïa ka 1st Mega Expo, ha ryngkat ka jingïatreilang bad ka Khonglah Enterprise na Amlarem West Jaiñtia Hills.
Katei ka Mega Expo ka long kum ka ïew ha kaba ka Khonglah Enterprise, ka la pynpoi ïa ki mar kiba la wan rah na kylleng ki ri ka pyrthei kum na Thailan, China, India, Afghanistan bad kiwei kiwei ki jaka, ïa kiba la die ha ki dukan bapher bapher ha ka dor kaba bit. Ïa katei ka ïew yn pynkut haduh ka lai phew tarik mynta u bnai.
U bah Kynjai Thongni Assistant Secretary ka Seng Samla Shnong New Nongstoiñ haba ïakren bad ki nongthoh khubor, u la ong ba hadien ba la plie ïa katei ka ïew, la buh ba kan don ka bai rung kaba shiphew tyngka ha kaba yn ai da ki slip kiba don ruh ïa ki serial number.
Baroh kiba wan rung kiba la ïoh ïa kitei ki slip ki dei ban buh bha, namar ha shuwa ban pynkut ïa katei ka MEGA Expo yn pynlong ïa ka khalai nusip lyngba kitei ki slip bad ki buskit ïa kiba jop ki don lai tylli kata u ba nyngkong ba ar bad ba lai. Nalor kata u la ong ruh ba haduh mynta, kiba bun ki tiar kim pat poi lut bad ha kine ki sngi ban wan, ki tiar ki ban dang poi ki dei kiba bha kata naduh ki tiar Ïing tiar sem, ki jaiñ ki nep bad bun jait ki tiar kiba lada thied na ïew na hat bun ba ym lah ban ïoh.
