Nongstoiñ, Jymmang 9: Ka Hynñiewtrep Youths Council West Khasi Hill District, ka pynpaw ka jingai khublei ïa baroh ki nongmihkhmat na West Khasi Hill District, kiba ïa shimbynta ha ka Meghalaya Games kaba saw, kaba la long ha ka 2 tarik haduh 7 tarik mynta u bnai ha nongbah Shillong.
Ka seng ka sngew dei ban ai mynsiem ïa kito ki khynnah kiba la wanrah burom ïa ka District, kumjuh ïa kito ki bym shim la poi ha ka thong, ba kin dang trei shitom nangne shakhmat, khnang ban wanrah burom ïa ka ïing ka sem, ka shnong ka thaw, khamtam ïa ka jaidbynriew lyngba ka jingïalehkai Sports.
Kito kiba poi sha ka thong ngi kyrmen ba kin dang trei shitom shuh shuh nangne shakhmat, khnang ba phin ïoh ïa ka thong kaba phi kwah namar ka thong jong phi ka dang jngai donkam ban trei shitom shuh shuh.
Ka seng ka ai khublei ruh ïa ki Association bapher napoh jong ka thaiñ, kiba la shimkhïa ban pynmih ïa ki khynnah ban ïa shimbynta ha kane ka Meghalaya games. Kumjuh ïa ki Coach ki Staff bapher bapher kiba la shimkhia ban ïarap ïa ki khynnah jong ngi, ïa ka Sports Department jong ka West Khasi Hill District.
Na ka liang ka seng ka pynpaw ïa ka sngewkhïa bad ka jingbym hun ïa ka jingpynkhreh ïa kane ka Meghalaya Games ba Saw da ka Meghalaya State Olympic Association (MSOA) ryngkat ka Sorkar, na ka daw ka jingbym biang ka jaka sah kiba biang ïa ki nongshimbynta.
Kumta ka seng ka dawa ba ka lah dei ka por ban pyntreikam noh ïa ka Sports Policy, kumjuh ban kham pynlut khambun ha ka Sports, khnang ba ka jylla jong ngi kan pynmih bun ki nongshimbynta.
Kumba long mynta kane ka pynhiar dor ïa ka Sports hapoh ka jylla, pynkut ka kyrwoh na u Samla Wanteibok Lyngdoh General Secretary Hynñiewtrep Youths Council West Khasi Hill District bad Samla Lumlang Kharsyiemlieh President Hynñiewtrep Youths Council West Khasi Hill District.
