Shillong, Jymmang 09: U Banbatjuban Khongwir u la ïoh rah ïa ka nam lahduh ha ka liang ki shynrang jong ka lympung ïalehkai ïakhun kti kaba la tip kum ka “31st Annual Armwrestling State Championship 2022” katba ka Magret pathaw kala long ka lahduh ha ka liang ki kynthei..
Ïa kane ka lympung ïakhun kti kaba la pynlong da ka Meghalaya Armwrestling Association ha ka sngi Saitjaiñ ha Hall jong ka KJP Assembly ha IGP la plie pyrda da u Bah George B Lyngdoh, MLA jong ka Umroi Constituency. Ki la don haduh 200 ngut tam ki nongïalehkai ïakhun kti kiba la wan ban ïa aireng na kylleng ki district ba kynthup na East Khasi Hills District, Ribhoi, West Khasi Hills, Garo hills bad na Jaintia Hills District.
Ka jingpynlong ïa kane ka lympung ka long ruh ban jied ïa ki nongïalehkai kiban mihkhmat ïa ka jylla sha ka National Arm wrestling Championship kaban sa long ha Hyderabad naduh ka 30 tarik Jymmang haduh ka 6 tarik Jylliew 2022.
Ïa kane ka rynsan la wan ban pynhap noh da ka Kong M Ampareen Lyngdoh kum ka kongsan ha ka jingdonlang ka Kong Jasmine Mary Lyngdoh kum ka symbud kongsan.
