Shillong, Jymmang 09: Ha ka ïakob ïalehkai carrom board ba 15 jong ka Lawei ka Ri Open Carrom Championship 2022 ba la pynïaid da ka Lawei Ka Ri Sports Social and Cultural Club, u Kitboklang Kharbangar u la ïohrah ïa ka nam lahduh ha ka ïalehkai paramarwei na ki khynnah shynrang (Boys Single), katba u Rajdeep Sarkar na ki shynrang (Men Single) bad ka kong Sukmon Mukhim ka la wan nyngkong na ki kynthei (Women Single).
Ha kane ka lympung ïalehkai caroom board ba la pynlong ha Indoor Sports Hall ha Mawlai Mawdatbaki, u Meban Marweiñ u la wan baar na ki Boys Single, u Rajib Dev u la wan baar na ki Men Single bad ka kong S. Nonngbet ka la wan baar na ki kynthei.
Ha ka Men Double la ïohrah da u Rajdeep Sarkar bad u Rajib Dev bad la wan baar da u M. Pde bad D.N Ronee, katba na ka Veteran Single la jop da u Manohar Thaba bad la wan baar da u Vinod Mizar bad ha ka Mixed Double la wan nyngkong ka Martha Mukhim bad u Philoston Diegdoh bad la wan baar da ka kong Baïahun Dohling bad u Justin Kharkongor.
Ha ka jingïakhun kum ka team ne kynhun ka Madaryting Carrom Club ka la ïohrah ïa ka namlahduh bad ka Ryntihlang B ka la wan baar.
Ïa kane ka lympung ïalehkai carrom board ba la sdang ha ka 3 bad kut ha ka 7 tarik u Jymmang, 2022 la pynhap pyrda da u Bah Process T Sawkmie kum u kongsan ha ka jingdon ryngkat lang u Bah Embhahlang Syiemlieh, MLA bad MDC barim ka Mawlai, ki nongkitkam ka Lawei ka Ri, ki nongpeitkai bad kiwei kiwei.
