Shillong, Nailur, 19: Katba ki nonglum ñiut jong ka Synroplang Self Help Group ki dang bunkam ban shim ïa ki jaboh jabaiñ ba la pynlang da ki paidbah bad ki nongshong dukan ka shnong Mawpat Circle-III kyntoit Shawshaw ha ka shiteng sngi jong ka Sngi Baar, ki la kyndit thret ban lap pynban da kawei ka metïap jong iwei i khunlung ba dang shu kha ba la thep ha kawei ka tin umphniang.
Ki nonglum ñiut ki la ïathuh ba ki lap ïa ka metïap jong i khunlung ba dang shu kha hadien ba la kraid ban pynbeit ïa ki ñiut ha ka por ba ki dang shu sdang ban shim katto katne ki song ñiut na ki paidbah.
Ïa ka met jong i khunlung la shimti noh da ki Pulit jong ka Nongmensong Out Post bad pynlong ka jingtohkit. U Rangbah Shnong jong ka shnong Mawpat, u Bah Judah Wahlang u la ïathuh ba ka Dorbar Shnong kan sa pynlong hi ïa ka jingtohkit kaba bniah ban lap ïa ki kmie ki kpa kiba la ïap noh ka mynsiem ïatiplem ban bret ïa ka metïap jong i khunlung ba dang shu kha.
“Ka long ka jingjia kaba pynshaïong ïa ka jingmut jingpyrkhat jong nga kum u Rangbah Shnong haba ïohsngew ïa ka jingïohtam ïa ka metïap jong i khunlung na ka kali,” ula ong.
“Ngi pynrem jur ïa kiba donkti ki bym don shuh ka mynsiem tipbriew tipblei ban shu bret ha ka jaka ka bym dei ban bret,” u la ong.
