Jowai, Nailur 17: Ka Federation of Khasi Jaiñtia & Garo People (FKJGP) East Jaiñtia hill District Unit ka ai ka jingkyrshan ba pura ïa kino kino ki kynhun khamtam ïaka KSU East Jaiñtia hill halor ka jingdawa ban maramot noh kloi ïa u Surok NH-6 uba la sniew shaba palat naduh Khliehriat haduh Ratacherra ha kaba ym ikop shuh wat tang ban ong u National Highway.
Ka jingsniew une u surok la ïohi ha kine ki sngi ki don shibun ki jingjia ba sngewsih ha utei u Surok bah kum ki jingjia aksiden ba khah khah bad ka la wanrah ka jingdheng kali kaba jur haka thaiñ bad sngew synei ban ong ba wat haka thaiñ Khliehriat kaba dei ka Head Quarters jong ka East Jaiñtia Hill District kaba i jah burom ïaka District ban peit ka jing jot utei u Surok bad bun sien ki kali rit haba poi ha Khliehriat kim juh ïaid shuh na u Surok bah bad ki pyndonkam na u Surok Pohshnong ka Khliehriat West namar ba utei u Surok bah ym long shuh ïaki kali rit ban ïaid.
Na ka liang ka seng FKJGP kala dep pynher shibun ki jingthoh sha ka NHAI Lyngba u Deputy Commissioner ka East Jaiñtia ban maramot ïa utei u Surok NH6 hynrei ka NHAI kam sngap bad kut tang haki jingkular thok donhi jong ka NHAI.
Khadduh ka seng ka kyrpad ïa ki arngut ki MLA ka thaiñ kata u bah Kyrmen Shylla bad ka Santamary Shylla ban pyrkhat ïaki jingeh ki paidbah namar ba ki paidbah ki jied ïa ki ba kin peit ïaki jingeh u paidbah, pynkut ka kyrwoh na u Information Secretary ka seng FKJGP-EJHD u Bah Mishal Chyrmang.
Ka All Jaiñtia Youth Welfare Organisation – East Jaiñtia Zone (AJYWO-EJZ), ka ai iaka jingkyrshan ba pura ia ka Synjuk Waheh Shnong East Jaiñtia Hills District, Khasi Students’ Union– Narpuh Circle bad ia ka Jaintia Students’ Movement – Eastern Region halor ka jingai por ba khatduh (Deadline) ia ki bor sorkar ban maramot noh ia u National Highway-6.
“Ka jingsniew sha ba palat pud jong u surok NH-6, uba dei u thied snam jong ka jylla Meghalaya bad ruh jong kiwei pat ki Jylla ha ka thaiñ Shatei Lam-mihngi jong ka Ri India, ha baroh shilynter, kata, naduh Soomer, West Jaintia Hills haduh Malidor, East Jaintia Hills, ka long kaba i sangot shisha, kaba la buh ha ka kordit bah ia ki paidbah nongleit nongwan ym tang ia kiba napoh ka jylla hynrei na kiwei kiwei ki jylla ka ri India”, ong u Bah Heatermoon Ryngkhlem, President ka AJYWO-EJZ.
U Bah Ryngkhlem ula bynrap shuh shuh, “Ka jingsniew jong une u surok ym tang ba ka buh jingeh ia ki nongleit nongwan, hynrei ka buh ruh ha ka jingma kaba khraw ia ki kali bad ki mynsiem briew ba kordor kiba dei iaid lynti lyngba une u surok. Kane ka jingleh kuman jong ka sorkar halor ka jingsniew jong une u surok, kala pynbitar shikatdei eh ia ki paidbah”.
“Ia mynta, ia une u surok, ym i kop shuh kum u National Highway namar dang lah u surok pohshnong (internal roads) bun bun shah. Ka jing bym maramot pynbha ka sorkar ia une u surok la iohi kumba ki trai kali ki khlem siew khajna surok”, bynrap biang u Bah Ryngkhlem.
“Kumta na ka bynta ka bha ka miat bad ka suk ka saiñ jong u paidbah ba leit ba wan kyngba jong une u surok, ka AJYWO – East Jaiñtia Zone, ka ai ka jingkyrshan kaba pura ia ka SWSEJHD, KSU, JSM halor ka jingai por ba khatduh (Deadline) jong ki ia ki bor ba dei peit ia une u surok ban maramot noh kloi kloi ia u.”, la pynkut u kyrwoh na u bah Ryngkhlem.
