Shillong, Jymmang 06: U Myntri Rangbah ka Jylla Conrad Kongkal Sangma hynne ka sngi thohdieng, ula pyntip ba ka Sorkar Jylla kan sa jubab shen lyngba ka Affidavit sha ka Ïingkashari Meghalaya High Court haba ïadei bad ka Roster System ban lah pyntreikam ïa ka Bhah thungkam (Job Reservation Policy) hapoh ka Jylla.
Haba ïakren bad ki nongthoh khubor hadien ka jingïalang jong ka kynhun Myntri, u Myntri Rangbah ula ong “Naba ka dei ka kam kaba bunkam bha, kaba jyrwit jyrwat bad ba donkam ban kheiñ ïa ki jingthungkam jong baroh ki Tnad la bun bun snem mynta, ka long kaba eh ïa ka Sorkar ban pyndep ïa ka roster system tang da ki sngi ne ki taiew”.
“Ka jinglum jingkheiñ ka dang ïaid shakhmat, ngi dang bunkam ïa kane bad ngi kyrmen ba shen ngin sa lah ban pynkhreh ïa ka affidavit ban ai jubab sha ka Ïingkashari bad ngin lah biang ha kaban shim rai ban pynïaid shakhmat ïa ka jingthungkam thungkam” ong u Conrad.
“Namar ka dei kaba bunkam bha, ki Tnad bapher bapher bad ka Sorkar Jylla ki dang bunkam ïa kane ka kam bad ngi ngeit skhem ba ngin sa lah ban pyndep noh shen” ula bynrap.
Lah ban kdew hangne ba ka Ïingkashari Meghalaya High Court ha ka 20 tarik Ïaiong, kala aipor lai taiew ïa ka Sorkar Jylla ban pyntreikam ïa ka roster system ((Roster System kadei ka jingtreikam, ne jingbuh jingkheiñ kaba da pyni shai lada khot aplikeshon, katno ngut la mang na ka bynta ki jaidbynriew kiba la buh da ka Reservation Policy)) ban lah pyntreikam ïa ka State Reservation Policy ha ka thungkam thungkam hapoh ki tnad Sorkar.
Ka Ïingkashari kala pynsangeh lut ïa baroh ki jingthungkam thungkam hapoh ka Sorkar Jylla katba ka Jylla kam pat don ïa ka roster system ha ka State Reservation Policy. Kala ong ba kane kan treikam ha baroh ki Tnad Sorkar bad kan treikam ruh ha Jylla haba thmu ban pyntreikam ïa ka Policy ha ka jingïathungkam thungjam.
Ka Ïingkashari kala pynpaw ïa ka jingkyndit ba wat hadien 50 snem ka jingïoh ïala ka jong ka Jylla, ka Jylla kam shym la don satia ïa ka roster system haba pyntreikam ïa ka State Reservation Policy. Kala buh jingkylli ruh ba kumno ka Sorkar Jylla ka lah ban pyntreikam ïa ka Reservation Policy khlem ka roster.
