“Lada phi dei u syntiew phin phuh beit la ha kano kano ka jaka: Bah F.R. Kharkongor
Leh burom ka Synod College ïa ki samla pule ba pyndep Degree
Shillong, Nailar 31 : Ka Synod College ha ka sngi Palei ka 31 tarik Nailar 2023 ka la pynkup burom ïa ki 636 ngut ki samla pule kiba la pyndep ïa ki degree na katei ka college mynta u snem 2023.
Ïa kane ka jingpynkup burom la pynlong ha Dinam Hall, Jaiaw ha kaba u Bah F.R. Kharkongor, IAS Commissioner and Secretary jong ka Sorkar Jylla u la ïadonlang bad pynkup burom ïa ki samla pule kum u Kongsan. La ïadon lang ruh u Principal ka Synod College u Dr R.M. Lyngdoh, nangta Dr. M Rani, Dr G Lyngdoh, ki nonghikai bad ki kmie ki kpa jong ki samla pule.
Ha kane ka sngi la sam ïa ki khusnam sha kito ki samla pule kiba la pasa bha ha ki jingpule bapher bapher ba kynthup ka khusnam Primrose Gapthoh Memorial Award la ïoh da ka samla Barisha Warjri bad ïa ka Dr D Wanswet Award la ïoh da u samla Badonhok Nongsiej.
La pynkup burom ruh da ka Thomas Jones Memorial Award sha ki arngut ki samla pule ba kynthup ka samla Aitisha Basaiawmoit bad ka samla Baihunshisha Khongshun, bad ruh sha ki 9 ngut ki samla pule lyngba ka khusnam Synod College Academic Excellence Award.
U Bah F.R. Kharkongor haba kren kum u kongsan u la ai khublei ïa ki samla kiba la lah ban pyndep ïa ka degree bad kyntu kynpham ba kin nang ïai trei shitom shuh shuh nangne shakhmat la ha kino kino ki jingpule ne ki kam. “Lada phi dei hi u syntiew phin phuh beit la ha kano kano ka jaka kampher watla shibun ki jingeh ba phi ïakynduh hynrei haba phi don ka mynsiem kaba thrang ban kiew shaphrang phin jop beit,” u la ong.
Shuh shuh u la kren ruh halor ka jingbym ïoh kam ïoh jam hapoh ka jylla. U Bah Kharkongor u la kyntu ïa ki samla pule ba kim dei ban long tang ki nongioh kam hynrei ban long pat kum ki nongai kam aijam ïa kiwei de. U la ai khublei ruh ia ki nonghikai kiba la trei shitom bad kyntu ruh ba kin nang iai ai ïa u synñiang u bynhei ban pynnang pynstad ïa ki samla pule.
Ha kane ka sngi la sam ruh ïa ki khusnam sha ki lai tylli ki tnad pule ba kynthup ïa ka Zoology, Chemistry bad ka Geography kiba la ïoh bat kyrdan ba nyngkong ha ki jingai jinghikai ba la sam lyngba ki momento bad syrnot lyngba da u Principal jong ka Synod College u Dr R.M. Lyngdoh.