Khliehriat, Nailar, 27: Ka Jaiñtia Youth Federation -East Jaiñtia Hills ka pynrem jur ïa ki ar ngut ki nongtrei jong ka company Topcem ba kyrteng u Arun Kejriwal (AVP) bad Umesh Kumar (GM) Mine, kiba la kren khlemakor bad kren pynshit ha ka jingïakhih ha ka sngi ba pynlong ïa ka public hearing jongka Meghalaya Cement Lts ha shnong Thangskai bad ka seng ka kynnoh ruh ba dei na ka daw jong ki ban kan sa jia ka jingshah shoh bad shah bom naphang ki paidbah naduh ki khynnah rit bad ki kynthei khynnah ha katei ka sngi.
Lyngba u kyrwoh ba la phah da u President ka JYF-EJH, u bah John Pala bad u Secretary, u bah Becare Chyrmang ki la phnpaw bad ong ruh ba “Katkum ki dur bad ki video ba la iohi lyngba pathai khubor la iohi ba la bom la sympat, la kura bad kynjat naphang ïa ki paidbah khlem jingmap la kum ki mrad, kane ka jingleh ne jingkren pynshit jong kitei ki bar jylla kiba hukum ruh ïa ki pulit ban bom naphang ïa ki paidbah ryngkat ka ktien sih ktien sang wat hapdeng ka jingdon lang ki khynthei bad longkmie, ka dei ka bym lah satia ban pdiang hapoh ka imlang sahlang jong ka bri u Hynñiewtrep, ka seng, ka dawa jur ïa ki bor badei khmih jong katei ka Company ban beh kam syndon ïa kitei ki arngut ki bar jylla kiba long ki nongtrei jong ka company, u Arjun Kejriwal bad u Umesh Kumar, ha kahuh ka por ka seng ka kyntu ruh ïa ki pulit ban kem bad pynshitom ïa kitei ki bar jylla khnang ba kiwei pat ki nongtrei bar jylla kin nym don shuh kiban wan shim kabu ban hukum (order) ban phah shoh phah dat ne ban phah pyniap ïa ki paidbah ”
“Ha ka jingshisha ki nongtrei bar jylla ki dei tang ki nongbylla, kim don hok ei ei ruh ban leh trai khlieh, ban leh ba heh ban kren sih kren sang hapoh ka ri Khasi Khasi Jaiñtia jong ngi, ka seng ka maham ruh ba kum kane kam dei shuh ban jia nangne shakhmat ba ki bar jylla kiba trei company ban pyni bor lane pynshongshit lada don kino kino ki kynja public hearing ha ka Elaka Narpuh” Ha kajuh ka por ka seng ka kyntu ïa ka sorkar ba ka dei ban shim khia halor kane.
Ka seng ka phah ia ka jingkitbok kitrwiang sha baroh ki paradoh para-snam kiba la mynsaw ha katei ka sngi.
