Nongstoiñ, Nailar 18: Ka KSU Nongstoiñ Circle ha ka sngi thohdieng, ka la lap ïa kawei ka ïing ha khlieh ïew Nongstoiñ ba ju pyndonkam da ki nongkhaïi drok ha kum ka ktem ban pyndonkam ha kaba ban dih bad khaïi drok kylleng ka sor Nongstoiñ.
Kane ka jinglap jong ka seng ka long hadien ba ka la trei shitom ban wad ïa ki sabut bad buddien ïa ki kam sniew, khamtam eh ka jingjyllei ki nongkhaïi bad nongdih drok ha sor Nongstoiñ. Ka seng ka la ïoh kem ruh ïa uwei u ba la donkti bad pyndonkam ïa katei ka ïing kum u nongshong wai.
Na ka liang ka seng ka la pynlong ïa ka jingthwet bad hapdeng ka jingwad sabut ka la lap ïa katei ka ïing, ka la seng ka la rung shapoh bad lap ïa ki tiar hapoh ka ïing ba pyndonkam da ki briew ba ju mlien ha ki kam drok. Ka seng hadien ba ka la khang tala, ka buh ruh ka jingmaham ïa baroh ki trai ïing ba kim dei ban ai wai ïa kum kine ki briew kiba pynjaboh ïa ka imlang sahlang.
Ha ki snem kiba la dep, na ka liang ka jong u Syiem u la dep ban pynmih ïa ka hukum ïa ki trai jaka kiba don ïing ne dukan hapoh ïew ba kim dei ban ai wai ïing sah hapoh ïew. Hynrei, imat ym don ba sngap ne kohnguh ïa ka jingbthah.
Kumta ka seng sa shisien biang ka ïawer ïa baroh ki trai ïing bad ki shnong ki thaw ba ki dei ban peit bniah ha shwa ban ai wai ïa kino kino ki briew bad ruh ki dei ban submit ïa ki kot ki sla kiba biang katkum ki aiñ shnong.
“Na ka por sa ka por ngi la ju ïoh sngew ïa ka jingud jingnam na ki riew paidbah halor ki jingsniew kiba don hapoh ïew Nongstoiñ. Ngi ruh na ka liang ka seng KSU ngi la leh ïa la ka kamram ban thwet man ka por ïa ki nongdih bad nongkhaïi drok. Mynta ka sngi ka seng ka la lap ïa kawei ka ïing ba ju pynlong ktem da ki nongdih bad khaïi drok”, ong u Comingstar Kharsyntiew General Secretary jong ka seng.
U la ong ruh, “Katkum ka jingïathuh kine kiba khaïi drok la ong ba ki la shim wai na uwei u ba dei trai ïa ka ïing. Hynrei, ngi la khang tala syndon ïa ka ïing bad buh ruh ka jingmaham sha baroh kiba dei trai ïing hapoh ïew Nongstoiñ ba kim bit ban ai wai klumar khlem da tip bha kiba kum kino ki briew ba thmu shong wai”.
