Nongpoh, Nailar, 18: Ki nongïalam jong ka HITO, RI-Bhoi District mynta ka sngi kila mih shakhmat ban dawa naki bor ba dei peit naduh ka sorkar jylla bad KHADC halor ka jingroi ki khyrdop khrong khajna ha u surok Bah National Highway ha Ri-Bhoi District, kaba la pynkhim mynsiem shikatdei ïaki nongñiah kali ba kit ïaki mar ki mata bala kynnoh ruh ba jur ka jingkiew dor ki mar ki mata naka jingbun palat ki khyrdop khrong khajna bala kynnoh ba kidei tang ki khyrdop beaiñ ba dei ban pynduh pyndam noh shisyndon.
Haba kren bad ki lad pathai khubor, u Bah Kenny Nongrum, General Secretary ka HITO, Ri-Bhoi District, u la pynpaw ba kum ka seng kala leit ban jurip ha shilynter jong u surok bah National Highway naduh Jorabat haduh Mawryngkneng, ha kaba kitei ki khyrdop ki ju khrong khajan na man la ki kali kit mar ha kaba kum ka seng ka dap da ka jingsngew lyngngoh la kitei ki khyrdop kidei kiba la ioh jingbit ne kidei kiba pynïeng beaiñ da ki riew shim kabu tang ban kamai pisa.
U la ong ruh ba dang ha kine ki khyndiat sngi la mih ruh sa kawei ka khyrdop thymmai jong ka KHADC haka shnong Umdihar ban khrong pisa naki kali kit mar, bad bun naki nongñiah kali kila ud bad khñium khamtam ki paidbah nongthied nongpet kaba la wanrah ruh ka jingrem ki mar ki mata naka jingbun ki jaka khrong khajna.
Shuh shuh naka liang ki nongïalam ka HITO mynta ka sngi kila leit ruh ban ïakynduh syndon ïa I CEM ka KHADC u Bah Pynïaid Sing Syiem ban ai ruh da ka dorkhas pyrshah ïaki khyrdop kiba ïeng harud ki surok bah National Highway bad dawa mardor ba dei ban shimkhia ban weng ïaki khyrdop bad naka liang u CEM u la kular ban shimkhia ïa katei ka kam.
