Da ka song pisa ïarap ka HNYF ïa u samla Gabriel Nongrum

Nongpoh, Jymmang 05: Ban pynpaw ïa ka jingsarong bad ka jingsngewkmen ïa u Samla Gabriel Nongrum kum uwei na u samla uba wat hapdeng ka jingduna ka khmat bad u bym lah ban iohi ki khmat, ka HNYF Northern Region ha ka sngi baar jong ka taiew ka la kner ïa ka jingïarap lyngba ka song pisa kum shi bynta ban kyrshan ïa utei u samla uba la ioh ban leit mihkhmat ïa ka ri India sha ka jingïalehkai phutbol ha England lyngba ka Indian Blind Football Team.
Ka seng HNYF Northern Region ka la shim ruh ïa kane ka sienjam ban ïa kner lem ki jingïarap sha u Samla Gabriel Nongrum, ka dei hadien ba ka la ioh jingtip ba une u samla u la shah jied ban leit mihkhmat ïa ka ri India lyngba ka Indian Blind Football Team ban leit ïakhun ïa ka Football sha England.
Ha katei ka sngi, ka seng HNYF wat la kam lah ban ïa kynduh markhmat bad une u samla, hynrei ka la aiti ïa katei ka song pisa sha ki kmie bad ba kiba haing hasem jong u samla Gabriel Nongrum kum ka dak ka jingai mynsiem bad ka jingkyrshan ba une u samla na ka them Ri Bhoi un dang lah ban wan rah ïa ka nam bad ka burom ïa ka District, ka jylla bad ka ri hi baroh kawei.
Na ka liang u Bah Marcus Marten kum u President ka seng HNYF Northern Region u la ai ruh ka jingkitbok kitrwiang ïa une u samla na them Ri Bhoi ba un dang lah ban pyndonkam hok ïa ka sap ka phong ba u don ha ka jingim wat lada u don ka jingduna ha ka khmat kaba ym lah ban iohi bad kane ka long hi ka jingsarong ïa ka Ri Bhoi bad ka jylla hi baroh kawei.
Kum u nongïalam ka seng HNYF u Bah Marcus Marten u la pynpaw ba ka seng ka sngewsarong ba une u samla wat hapdeng ka jingduna ka dkhot met kaba um lah ban iohi, hynrei ka sap ba kyrpang kaba u don ka la long ka jingsarong ïa ka ing ka sem jong u, ka imlang ka sahlang, ka District, ka jylla bad ka ri hi baroh kawei. Kum ka seng ka khmih lynti ba une un long u ka nuska na ka bynta kiba ba balang ba ki hap ban pyndonkam hok ïa ka sap kyrpang ba la ai da u Blei.
Ha kajuh ka por ka seng ka ai khublei ruh ïa u Incharge ka Byrnihat Police Outpot bad kumjuh ruh ïa u Ranger ka Forest jong ka Beat House 13mer, kiba la don kti lang ban ïa rap na ka bynta une u samla bad u khmih lynti ba lada don ki riew kylluid mynsiem ngin dang lah ban kner ki jingïarap na ka bynta kito kiba don shisha ka sap ha ka jingim jongki hapoh ka District bad ka jylla hi baroh kawei.