Pynkhuid ki nongñiah cycle ïa ka jaka ïalehkai ha khlaw Malki

Shillong, Jymmang 05: Ki nongñiah cycle jong ka kynhun Meghalaya Cycling Association kila pyni ïa ka nuksa kaba bha tam sha kiwei pat ki nongïalehkai bad sha kiwei pat ki kynhun pynïaid ïalehkai, ha kaba mar syn dep ka jingïalehkai kila pynkhuid noh bad tam noh ïa ki jaboh jabaiñ, ki plastic, ki bilor bad kiwei kiwei kiba kila dep ban pyndonkam.
Ïa kane la sakhi ha ka sngi Palei ba ki nongïalehkai ñiah cycle kila pynkhuid ïa ka sawdong sawkun jong ka khlaw Malki kaba la pynlong ïa kane ka jingïaleh kai hadien bala kut ka jingïalehkai ha ka lympung ïalehkai Meghalaya Games 2022 bala pynlong da ka Meghalaya Cycling Association ha khlaw Malki ban pynthikna ba katei ka jaka kan long kaba khuid.
Ïa ka jingïakop ñiah cycle la wan ban kaweh lama da ka Kong Ampareen Lyngdoh kaba dei ka MLA kum ka kongsan. Ha kane ka ïakop ñiah cycle u Kevin John Khyllait u la long u lahduh.
Kum ban pynkynmaw hangne ba ka Cycling ka napdeng ki 19 tylli ki jait jingïalehkai kaba la ïoh jaka mynta ka kynti ha ka Meghalaya Games 2022.