Shillong, Jymmang 05: U Kevin John Khyllait na ka shnong Longki Ingding, Eastern West Khasi Hills District u la long u lahduh ha ka ïakop ñiah cycle (MTB Cross Country) bala pynlong da ka Meghalaya Cycling Association (MCyA) ha ka 4th Meghalaya Games hadien ba u la pyndep da 1 kynta 11 minit ha baroh lai tylli ki jingïakop.
U Maitshaphrang Kharwanlang bad Gilbert Wahlang, baroh arngut kiba dei na South West Khasi Hills District ki wan ha ka kyrdan ba ar. U Khyllait ula jop ruh ïa ka Khasi Hills Challenge 1.0 kaba dang shu dep long shen ha Kharang, East Khasi Hills District bad ha katei ka lympung la kyrshan da ka Shillong Press Club.
U Reuben Nicol Kharchandy, 16, bad Anissa Lamare kila khur takma Ksiar ha ka kyrdan ïakop Down Hill ha ka liang ki shynrang bad kynthei katba u Nicholas Syrti jong ka West Jaintia Hills District u la jop takam ksiar ha ka DH (hardtail) ha ryngkat u Taitus Ch Marak (NGH) bad Aaron Oniel Kharpuri (EKH) kila khur takma rupa bad takma rnong.
U Kharchandy, uba dei u samla pule jong ka St Edmunds School, u la ïakhun ïa ka eksam matrik bad u la sdang ban ñiah cylcle (DH bad Enduro) mynta lah lai snem eiei. Ha ka kyrdan jong ki junior, Pynshailang Khyllait (EWKH) u la jop takma ksiar katba u Thrangskhem Pariong (WKH) bad Kyrmenskhem Nongram (EWKH) ïa ka takma rupa bad takma rnong.
Ha ka ïalehkai cross country jong ki kynthei, ka Balasiewdor Wahlang (SWKH) kala jop takma ksiar, Lamtimai Khyllait (EWKH) ïa ka takma rupa bad Aidotis Khyllait (EWKH) ka jop takma rnong.
