Mynjur u Modi ban bishar ïa ka jingdawa ILP bad ktien Khasi-Garo

Shillong, Nailar 09 : U Myntri Rangbahduh ka Ri, u Narendra Modi u la kular ban bishar bniah ia ka jingdawa jong ka kynhun Myntri ka jylla ban pyntreikam noh ia ka Inner Line Permit bad ruh ban ai jingithuh noh ia ka Ktien Khasi bad Garo ha ka Khyrnit kaba Phra jong ka Riti Synshar jong ka Ri.
Haba kren bad ki lad pathai khubor shisngi hadien ba ki la wan ban kynduh ia u Modi ha nongbah Delhi, u Myntri Rangbah ka jylla, Conrad K Sangma u la ong, “Halor ka ILP, u Myntri Rangbahduh ka Ri u la kular ban bishar bniah ia ka bad un sa pyntip pat sha ka sorkar jylla naba u hap ban ïa syllok shwa bad ka tnad Kampohïing ka Ri.”
Lah ban kdew hangne, ba ka kynhun Myntri hapoh ka jingïalam jong u Myntri Rangbah ha ka sngi Ba-ar ki la leit ban kynduh ïa u Modi ban kyrpad pyntreikam noh ïa ka ILP, ka Ktien Khasi -Garo nalor bun kiwei kiwei ki phang kiba ïadei bad ka roi ka pa jong ka jylla.
Kumban shu pynkynmaw, ka Ïing Dorbar Thawain ka Jylla ha u snem 2019 ka la mynjur da ka Resolution na ka bynta ban pyntreikam noh ïa ka ILP hynrei haduh mynta katei ka mat ka dang sahkut ha ka sorkar pdeng.
Na ka liang u Conrad u la ong ruh, “Ngi la dep ban pynpaw ha u PM ïa ka jingthrang jong ki paidbah ka jylla ban don noh da ka bor ha ka jylla kaba lah ban ïada ïa ka jinglong tynrai jong ki trai jylla bad ngi la pynpaw ruh ba dei tang ka ILP kaba ngi lah ban pynurlong ïa ka.”
Shuh shuh u la ïathuh ruh ba ki la dep ban pyrshang da ka Meghalaya Residents Safety and Security Act (MRSSA). “Ngi la pynshai ïa u shaphang ka MRSSA bad u la pynsngap ïa ka jingpynsngew jong ngi bad u sngewthuh ruh ïa ka jingangnud ki paidbah ka thain shatei lam-mihngi jong ka Ri.”
Ha kajuh ka por, u Conrad u la ïathuh ba halor ka jingkren pynbeit pud kaba dang ïaid mynta, u Modi u la pynpaw ïa ka jingsngewkhia halor ka jingdon ki jingjia kiba dang ïai jia khamtam haba ki don ruh ki khep ba hapoh ka ri ym pat lah ban pynbeit.
U la ïathuh ruh ba na ka liang u Myntri Rangbahduh ka Ri u la ïaroh ïa ka jingmih jong ki nongïalam ka thain shatei lam-mihngi ka ri hapdeng kine ki jingeh baroh hynrei ki tynrong lang ban ïakhun. U ong ruh ba u pynpaw ïa ka jingsngewkmen halor kane bad kumta u la kular ban ai ka jingkyrshan na ka sorkar.
Haba ïadei pat bad ka jingkren pynbeit pud bad ka HNLC, u Conrad u la ïathuh ba u Modi u la pynpaw ïa ka jingthrang ba kan don noh ka jingsuk kaba pura ha ka jylla Meghalaya. “U la pynpaw ïa ka jingkmen bad u ong ruh ba u kwah ban ïohi ba ka Meghalaya kan jam shakhmat bad ban pynbeit noh ïa ka mardor.
Ha katei ka jingïakren kaba la neh kumba 25 minit, u Myntri Rangbah u la pynpaw ruh ba ki la pynsngew shibun kiei kiei kiba ïadei bad ka jylla bad na ka liang u Myntri Rangbahduh ka Ri ruh u la pynsngap ïa kitei ki jingïakren bad kular ban bishar bniah ïa ki baroh.