Jied ka NPP Mawkyrwat Block ïa u H. Stalin kum u Adhoc President
![](https://mawphor.com/wp-content/uploads/2023/08/5-Copy.jpg)
Mawkyrwat, ‘Nailur 03: Ka National Peoples Party (NPP) jong ka Mawkyrwat Block ka la pynlong ka jingïalang ba kyrkih hadien ka jingiehnoh kam jong u bah A. Nongrem uba bat kum u President jong ka NPP Mawkyrwat Block bad ha kane ka jingïalang la ïatai ban jied bujli dawei pat u ban long u nongïalam jong ka NPP Mawkyrwat Block.
Ha kane ka jingïalang hadien ka jingïamir jingmut bad ïatai sani, la thaw noh da ka Adhoc Committee ba thymmai ha kaba la jied ïa u bah H. Stalin Diengdoh kum u Adhoc President bad ïa u bah Batbokshisha Marweiñ kum u General Secretary. Shuh shuh ha kane ka sngi ka la don ruh ka jingïatai kumno ban bud-dieng ïa ki kam kiba dang sah, la ki long ki Political Appointment bad kiwei de ki kam ban pynkhlaiñ ïa ka party baroh kawei.
Ym tang kata, ha kane ka sngi ka NPP Mawkyrwat Block ka la ïoh ruh ban pdiang ïa ka jingwan rung ki nongkyrshan ba thymmai kata kiba dei na ka Trinamool Congress Party (TMC) ha kaba ki don baroh 23 ngut ki nongkyrshan.
Ïa ki nongkyrshan ba thymmai kiba la wan ban pynïasoh la pdiang sngewbha ha ryngkat ka jingïadonlang naduh u bah Kitborlang Nongrem, President jong ka NPYF, South West Khasi Hills District, u bah W. Sangriang, General Secretary ka NPP bad kiwei de ki nongtrei party.