Halor ka “Entrepreneurship and Economic Development” ïathir nia ka Sngap Syiem College

Mawkyrwat, Jymmang, 04: Ka Sngap Syiem College, Mawkyrwat, lyngba ka Department of Commerce ka la pynlong ïa ka seminar ba shisngi halor ka “Entrepre-neurship and Economic Development” ha ka hall jong kane ka skul pule, ha kaba ki nongïashim bynta ki long haduh 100 ngut.
Ka jingthmu jong kane ka seminar ka long ban hikai ïa ki nongpule halor ka jingkordor jong ka jingsengkam (entrepre-neurship) bad ka jingnoh synniang jong ka sha ka jingkiew ka ïoh ka kot.
Ha ka bynta ba nyngkong jong ka seminar, ka kong A. Kharbudon, Industry Linkage Expert SANKALP, kaba hap hapoh ka MSSDS, ka la long ka nongai jingkren (resource person) ha kaba ka la kren halor ka jingsengkam bad ka jingïarap jong ka ha ka lad ïoh kam ïoh jam (Entrepre-neurship and Its Contribution towards Employment”.
Ka kong Kharbudon ka la batai shaphang u nongsengkam (entre-preneur) kum uta u briew uba sdang, uba pynïaid, uba wanrah ïa ka jingroi ha ka ïoh ka kot na ka bynta ïalade bad ïa kiwei ruh kumjuh. Ka la kren ruh halor ka jingïadei ba donkam jong u nong sengkam bad ka ïoh kam ïoh jam. Kumjuh ruh la phiah ïa ki jait nongseng kam ha ki ar jait, kita ki long uwei uba seng kam namar ka jingsngew donkam (necessity) bad u wei pat uba seng kam namar ki don ki lad ki kabu ba biang (opportunities).
Ka la batai bniah ruh shaphang ki jait jingseng-kam kum ka small business entrepreneurship, ka social entrepreneurship, ka scalable startup entrepre-neurship, ka inno-vation entrepre-neurship bad ka big entrepre-neurship. Shuh shuh ka la ai ruh ïa ka jingpynïapher hapdeng u nongsengkam bad u nongshah ai kam. Ka la kham ban ruh halor ka jingïoh jingmyntoi na ka seng kam seng jam bad ki jinglong ba kongsan jong ka.
Ha ka bynta ba ar jong ka seminar pat, u bah Nathaniel Kharkongor, Senior Manager jong ka PRIME (Promotion and Incubation of Market-Driven Enterprises), u la long u nongai jingkren ha kaba u la batai halor ka seng kam seng jam bad ka jingkyrshan jong ka sorkar (Entrepreneurship and Governmental Support).
U bah Kharkongngor u la batai ba ban long u nongsengkam uba jop, donkam ïa ka jinglah ban mutdur, ban ithuh thikna ïa ki jingeh bad ban wad ïa ki lad ban weng ïa ki jingeh. U la ong ruh ba ka jingpynroi ïa ka jingtip shuh shuh ka long kaba donkam bha na ka bynta ban lah ban pyndonkam pura ïa ki mar (resources). U la batai shai ruh shaphang ki ba bun ki lad jingïarap pisa lyngba ka prime incubation ha kaba 50 ki nongseng kam la jied.
Ha kine baroh ar ki bynta jong ka seminar, la ïoh ban pynkut da ka jingïathir jingmut bad ki nongïashim bynta kiba la wanrah ruh ïa ki jingkylli bapher bapher.