Plie u Bah Metbah ïa ka ïing skul ba thymmai jong ka Mairang Presbyterian Science College

Mairang, Jymmang 3: U Bah Metbah Lyngdoh uba dei u MLA ka Mairang ha kajuh ka por uba dei ruh u Lamphang ka ïng dorbar thaw aiñ ka jylla mynta ka sngi u la plie paidbah ïa ka ïng skul ba thymmai jong ka Mairang Presbyterian Science College.
Haba kren ha ka jingialang kum u kongsan u Bah Metbah Lyngdoh u la pynpaw ka jingsngew sarong ba ka Mairang Presbytery kala peit bad la jngoh ban wan mih sha khmat ha kaba iadei bad ka jingdon bynta ban plie ia ka lad ka lynti na ka bynta ki khynnah ki khun jong ka Presbytery bad jong kane ka dong ka thain na ka bynta ban ai jinghikai ia ki khynnah.
Na ka liang u bah Metbah u la pynsngew ba ki nongpyniaid ka college, ki la leh ia kaba janai eh ym tang ban shu pyndep rukom hynrei ki lah leh ha ka rukom kaba dei eh bad ia baroh kiba ia noh synniang ha la ki jong ki jong.
“Nga kwah ban kham phai khmat sha ki skul bad College kiba don ha ka thain nongkyndong hynrei ka jinglong nongmih khmat na Mairang kaba jngai na sor Shillong kala plie lynti ia nga ha kiba bun ki liang bad kila don ki khep ba nga don ka jingleh rain haba ki skul sorkar skul ki riew shimet ym lah ban pdiang ia ka jinglong jingman jong ki skul bad kum ki nongialam ngi dei ban wad bad buh ka jingmut jingpyrkhat bad dei ban buh ia ka daw halor ka jingjot jingpra jong ki skul ha ka thain nongkyndong,” ong u MLA ka Mairang.
Ha kaba iadei bad ka jingkyrpad jong ki bor pyniaid kane ka jaka pule, u Bah Metbah u la ong, “Ngam don ha ka sorkar hynrei ngan phah da ka Direct Order ha ryngkat bad ka dorkhas sha ki bor ba dei peit jong ka tnad ka pule puthi ban leh eiei halor ka jingdawa jong ki namar ba nga kwah ban pynurlong ia kine ki jingangnud, na ka bynta ka jingpyniaid beit iaid ryntih jong kane ka jaka pule.”
Halor ka jingdonkam jong kane ka jaka pule u Bah Metbah u la ong ba lada dei nangno nangno ruh ngan sa thaw ki lad ki lynti bad ha kane ka sngi u Bah Metbah u la buh T.7 lak na ka bynta jong kane ka skul.
U Bah Metbah u la pynpaw ruh ba un sa khot ia u myntri ba peit ia ka pule puthi bad kumjuh ruh ban ia kren bad u myntri rangbah halor ka jingdonkam jong ka skul lada don ka lad ka lynti ha kaba iadei bad kano kano ka grand bad ki jingdonkam jong ki jaka pule hapoh ka jylla hi baroh kawei.