Kumba 49 lak mang pisa ka sorkar ïa ki VOs bad kumba 4 lak ïa ki producer groups

Nongpoh, Jymmang 03: Kum ka jingplielad ïakiba bun ki Self Help Group haka thaiñ Ri-Bhoi bad kumjuh ruh ki Village Organisation naka bynta ban ioh ïaki lad jingïarap naka sorkar ka ophis u Deputy Commissioner ka Ri-Bhoi District mynta ka sngi kala pynlong ïaka Mega Event bad SHG Mela ha madan Lumnongrim Byrnihat kaba dei ruh shibynta jong ka jingrakhe ïaka Northeast Festival halor ka jingdap 75 snem ka Ri India, ka jingpynkup bor ïaki khun kynthei bad kumjuh ruh ka jingdap 50 snem jong ka jylla Meghalaya.
Ha katei ka Mega Event bad SHG Mela la wan ruh ban shim bynta da ki kynhun SHG bad ki VO bapher bapher ha kaba la buh ruh da ki dukan bapher bapher kum ka jingpyni nam ïaki kam ba ki SHG ki trei bad pynmih na katei ka thaiñ ha kaba lyngba katei ka sngi la paw pyrthei ruh ba ki longkmie lyngba ki SHG ki trei shitom hala ki jong ki shnong ban leh shibun ki kam kum ka jingkyrshan dalade ïalade bad ban ai mynsiem ïakiwei ki para longkmie ban ieng hala ki jong ki kjat.
Ha katei ka sngi naka liang u Myntri Rangbah u la sam ruh ïaki cheque kum ka jingïarap ïaki longkmie lyngba ki kynhun SHG ba ki don ha kaba ha katei ka sngi la ioh ruh ban mang pisa kumba T.4960000/- naka bynta ki Village Organisation bad T.440000/- naka bynta ki Producers Group kum ka jingïarap bad ka kyrshan ïaki longkmie ha Ri-Bhoi District.
La wan ruh ban shim bynta ha katei ka sngi da u Conrad Sangma Myntri Rangbah ka jylla kum u kongsan haka jingdonlang u Bah Sosthenes Sohtun MLA ka Jirang, u Bah Victor Ranee MDC, u Deputy Commissioner ka Ri-Bhoi District u Arpit Upadhyaya, u Joram Beda Secretary ka tnad Planning haka jylla, ki ophisar naki tnad sorkar bapher bapher, ki nongïalam shnong bad ki riew rangbah.
Watla da ki hajar ngutki paidbah kila tuid ha katei ka sngi ka jingwan iuh kjat u Myntri Rangbah ka jylla naka bynta ban ai jingïarap ïaki VO bad SHG pynban u lapbah ba jur u la ther ha katei ka sngi ban pynthud ïa katei ka prokram kaba la pynkhreh haka rukom kaba dei.
Haba kren ha katei ka sngi naka liang u Conrad Sangma kum u kongsan u la pynpaw ka jingthaw ïaki SHG haka jylla ka long kum ka jingai bor ïaki longkmie ban ieng hala ki jong ki kjat bad kumjuh ruh ban kyrshan pisa ïaki naka liang ka sorkar lyngba ka MSRLS, ha kaba la sdang naduh u snem 2018 bad ki don tang kumba 3000 tylli ki SHGs hynrei da ka jingtrei shitom ka sorkar MDA ha kine ki 4 snem mynta la lah ban thaw kumba 35 tylli ki SHGs haka jylla bad la lah ban ai jingïarap kumba 200 klur haka liang ka pisa bad kane ka dei ka jingtreikam jong ka sorkar kaba dang don ruh ki jingangnud ban dang kyntiew shuh shuh ïaki SHGs haka thaiñ Ri-Bhoi bad ka jylla baroh kawei.