Ki nongpathai khubor ki long ki nongai jingtip ba kyrpang:Laloo

Jowai, Jymmang 03: Kawei na ki kynhun treimon sngewbha ki 11 ngut shiparok na Jowai kaba la tip kum ka ‘Sarot I Man’ kaba la ju synñiang ïa ki kam ba bha hapoh ka imlang ka sahlang naduh ba la seng ïa ka ha ka 25 tarik Nohprah 2020, mynta ka sngi kala pynkup burom kyrpang ïa ki nongthoh khubor ka Ri-Lum Jaiñtia hapoh ka lama jong ka Jaiñtia Journalism Association (JJA).
Ka ‘Sarot I Man’ kala shim ïa kane ka bynta kum la lad ban ai mynsiem ïa ki nongthoh khubor ka Ri-Lum Jaiñtia ban kin nang bteng ban ai ka jingshakri kaba bha tam ïa ka imlang ka sahlang.
Na ka liang ka Sarot I Man kala pynkup burom kyrpang ïa ki nongthoh khubor ha kane ka sngi ka long kum ka jingpynkynmaw ïa ka sngi jinglaidluid jong ki nongthoh khubor ban pynsngew ïa ka hok kaba ki dei ban ai jingtip sha ki paidbah ne ka ‘World Press Freedom Day’ ïa kaba la rakhe ha shi tyllup ka pyrthei.
U ma Requoma Rq Laloo uwei na ki dkhot ka Sarot I Man ha ka jingkren lyngkot ula pynpaw shaphang ki kam jong ki lad pathai khubor namar kam long kaba suk da kaba ki hap ban trei shitom sngi la bad miet ban pyndep ïa ka kamram ban ai jingtip sha ka imlang ka sahlang bad ha pyrthei hi baroh kawei.
Ula pynsngew ba kane ka jingai burom kam da long kaba heh hynrei kala long kum ka dak jong ka jingburom bad ka jingsah jingkynmaw pateng la pateng, ula ong ruh ba ‘ki nongpathai khubor ki long shisha kita ki nongai jingtip ba kyrpang ha ka shynshar ka khadar bad ka roi ka par’.
Halor kane ka jingai mynsiem jong ka kynhun ‘Sarot I Man’ naka liang ki nongthoh khubor kila pynpaw ka jingai khulei ïa katei ka seng kaba la shim ïa kane ka bynta kaba khraw bad la kitbok ba kan dang lah shuh shuh ban trei ïa ki kam ba bha jong ka ha ka imlang ka sahlang ha kine ki sngi ban wan.
Hashwa kane la don ka jingïalang ba lyngkot ha Yadalada Villa, Kdohhati Dulong Jowai ba la pynïaid da u ma Kyllimot Lhuid, la ïoh ruh ka jingduwai ainguh da u ma Barlee Moore Shilla, bad ka jingkren ai khublei da u ma Wombai Sumer.