Nongstoiñ, Jymmang, 03: Na ka bynta ban pynkhlaiñ ïa ka party ha shuwa ka election ka ban long ha u snem ban wan, ki nongïalam ka Youth Wing jong ka HSPDP Rambrai Jyrngam Constituency, ki la pynlong ïa ka jingïakynduh lang ha Rambrai na ka bynta ban pynthymmai ïa ki nongkitkam jong ka Youth Wing.
Ha katei ka jingïalang ba la pynïaid da u samla Pynshai Joel Dkhar u ba dei u Joint secretary ka HSPDP Youth Wing central body la ïadon ryngkat ruh da u bah K.P.Pangñiang President rangbah ka party. Ha shuwa ban pynskhem ïa ki nongkitkam ba thyamai jong ka Youth Wing, la ïoh ïa ka jingkren na u bah B.Rani President ka HSPDP Mawlangsu zone, bah D.P Wanñiang president ka HSPDP Rimuliang zone, Bah Josking Mawsor Organising ka HSPDP Nongtrai Area bad na u bah K.P.Pangñiang President ka central body.
U bah Pangñiang haba kren ha katei ka jingïalang pynthymmai nongkitkam, u la ong ba ki samla ki don ïa ka jingkitklieh kaba khia na ka bynta ka lawei jong ka shnong ka thaw, ka imlang sahlang bad ka synshar khaddar. U la ong ruh ba ki samla ki bym don ka jingkitkhlieh bad ki bym shimkhia na ka bynta ban pynbha ïa ka imalang sahlang ki la long thik kum ki samla kiba thiah pang ha ICU.
U la ong ba ka jingkhlaiñ jong ka synshar khaddar ka shong ha ki samla. Haba phai sha ka jinglong jingman jong ka synshar khaddar ha kine ki sngi ka la donkam haduh katta katta ba ki samla kin mih shakhmat ban kit ïa ka lyngkor jong ka synshar khaddar, hynrei ka mat kaba hakhmat duh kaba ki hap ban shim ka long ban kiar na ka jingrhah spah, ka khwan myntoi, kwah burom, bad ka hanga mei. U la ong ruh ba lada ki samla ki trei ïa kano kano ka kam lane ki don ha ka saiñ pyrthei ka jingsngew rit ka dei kaba donkam eh. Nangta ka jingïaburom mar kylliang uwei hadien uwei pat bad ka jingïasngewthuh jingmut shuwa ban leh ïa kano kano ka kam.
U la kyntu ïa ki nongkitkam jong ka youth wing ba ki dei ban trei shitrhem bad trei hok ïa ka kam ba la bynshet ha ki, khnang ba ka jingthmu kan long kaba sei soh bad ban wanrah ruh ïa u soh jong ka jingjop ha ka election k aban long ha u snem ban wan.
Ki nongkit kam ba thymmai jong ka HSPDP Youth Wing Rambrai Jyrngam Constituency kiba la pynskhem ha katei ka sngi ki long, President Boni Lyngdoh Lyngkhoi, Vice President Pyrkhat Wahlang, Ombarly Wanñiang bad Josking Mawsor, Secrteary Lakyntiew Paliar, Joint secretary Goodliness Shangoi, Organising Secretary Pynshai Joel Dkhar bad lai ngut ki Adviser ne ki nongai buit u bah B.Rani, bah D.P.Wanñiang bad bah Richmond Nongsiej.
U President rangbah ka party u la pyntip ruh ba yn pynlong ïa kawei pat ka jingialang ha ka 21 tarik mynta u bnai ha Rambrai. Ha katei ka jingialang yn pdiang burom ïa ki riew rangbah bad ki longkmie napoh ka Constituency kiba wan rung thymmai sha ka party.
