Shillong, Naitung, 15: Ki shipai BSF jong ka 4th battalion kiba dang ïaid pahara ha khappud, ki la ïoh kurup 7 tylli ki lieng shna hi ba la pyndait da ki Engine ba la pynkit da ki hajar kilo ka shini ba la thmu ban shalan be-aiñ sha ka ri Bangladesh lyngba ka khappud jong ka West Jaiñtia Hills.
Ka jingïoh kurup ïa kine ki mar khaii tuh ka long hadine ba ki shipai BSFki la lap ïa ki snar khaii kiba dang ñiah ïa ki lieng ha wah Huroi hajan ka Border Out Post Jaliakhola.
Tang shu ïohi ïa ki shipai BSF, ki snar khaii tuh na ka ri Bangladesh ki la ryngkoh sha wah bad jngi sha shiliang jong u pud u sam ka ri Bangladesh bad iehnoh ïa ki lieng ha wah.
Ha kine ki lieng, ki snar khaii tuh ki la kit kumba 29000 kilo ka shini kaba shongdor palat T. 11 lak.
Ïa ki lieng bad ïa ka shini ba la ïoh kurup la aiti noh sha ka Custom Office, Dawki ban leh ïa kaba donkam.
