Na u CM buddien u President ka VPP halor ka Reservation Policy thung Expert Committee

By Mawphor Editor On Jul 14, 2023

Shillong, Naitung 13 : Ka Voice of the Peoples Party hynne ka sngi ka la leit ban buddien na u Myntri Rangbah ka jylla, Conrad K Sangma haba ïadei bad ka ishu halor ka bhah kam bhah jam lane ka Reservation Policy.
Nalor katei ka mat, ka VPP hapoh ka jingïalam jong u Bah Ardent ka la rah ruh bad san tylli kiwei pat ki mat kiba kynthup naduh ka jingshong suk shongsaiñ ha ka jylla, nangta ka jingshah shimkabu ki nongrep, ka jingïaid Odd bad Even number ki kali kamai, ka jingkiew dor ki marbam mardih bad ruh ka jingïai bteng ka jingpynlip bording ha ka jylla.
Haba kren bad ki lad pathai khubor hadien ka jingïalang, u Bah Ardent u la pyntip ba kum ka party ki la kyntu ïa ka sorkar jylla ba kan pynstet na ka bynta ban jied noh ïa ki dkhot jong ka Expert Committee ba kan sdang ban bishar bniah noh ïa ka Reservation Policy jong ka jylla.
U Bah Ardent u la ïathuh ruh ba u Myntri Rangbah u la kular ha ka kynhun ba ka Search Committee ka la tyrwa katto kate ki kyrteng kum ki dkhot jong ka Committee hynrei ka Committee mynta ka dang pyrshang ban jied pat ïa ki kyrteng ban khlieh ïa ka kum u Chairman.
“La pyntip ïangi ba kane ka kam, kan ym shim por shuh palat ïa ka ar ne lai taiew,” u la ong.
Haba kren pat halor ka suk ka sain ha ka nongbah, u Bah Ardent u la ong ba ki kyndit haduh katta katta ban ïohi ba ka jingleh ki bor bor distrik ka pyni pynban ïa ka khubor ba ka nongbah Shillong kam dei shuh kaba shong shngaiñ tang na ki katto katne ki jingjïa hangne hangtai.
Haba kren pat halor ka ishu kaba ïadei bad ki nongrep, utei u nongïalam ka VPP u la ong ba ki sngewkmen ba u Myntri Rangbah u la kular ban shimkhia haba ïadei bad ka jingeh jong ki nongrep khamtam haba ïadei bad ka jingshah shimkabu jong ki ha ki iew ki hat.
Shuh shuh u Bah Ardent u la pynpaw ruh ba ka jingsngewkhia halor ka jingjur palat ka jingkiew dor ki marbam mardih kaba la ktah haduh katta katta ïa kito ki longiing kiba kham duna ka ïoh ka kot.
Ha kajuh ka por, utei u rangbah ba dei ruh u MLA ka Nongkrem u la ong ba ka party ka kyntu jur ïa u Myntri Rangbah ban pynsangeh noh mardor ïa ka jingpynlip bording ha ka jylla baroh kawei.