Phai khmat sha ka rep ka riang pynshlur ka Myntri ïa ki paid ha ki thaiñ par dewïong

Shillong, Naitung 07: Ka Myntri ka Tnad kam rep ka Jylla ka Kong Ampareen Lyngdoh myn ha ka sngi Thohdieng ka la pyntip ba ka Tnad ka la ai ïa ka lad kamai jakpoh sha ki briew ba sah ha ki district ba don kyrhai u dewiong ka Ri-lum Jaintia Hills.
Haba ïakren bad ki nongthoh khubor, ka Kong Ampareen ka la ong “Kiba bun ki tnad ki la ïawan ïatreilang ha kane ka bynta ban pynkohnguh ïaki briew ka Ri-lum Jaintia bad West Khasi Hills ba tad haduh ka por ba la don ka lynti kaba biang ban tih dewiong biang, kine ki dei ki lad bad sngewbha ban ïatreilang bad ngi bad phaikhmat sha ki lad ki kabu ban kamai jakpoh ha ka lynti kaba dei”.
Ka la ong ba ka Tnad Agriculture ka la shim ïa ka sienjam ban ïakhun ïa ka jingkylla ka suiñbneng bad pyrshang ban pynshlur ïa ki nongshongshnong na East Jaintia Hills bad katto katne ki jaka ka West Jaintia Hills bad West Khasi Hills ruh kiba dei ki jaka tih dewiong, ba kin phaikhmat biang sha ki kam rep.
Kine ki District ha kine ki khyndiat snem ki la sakhi ba ka kamai ka kajih ki hajar ngut ki briew ki la shah ktah namar ka jingkhang tih dewiong hapoh ka Jylla.
“Ngi la lah ban pynkohnguh ïa ki ban phaikhmat sha ka rep ka riang kum kawei pat ka lad kamai jakpoh khnang ba ha kajuh ka por phi ïarap ruh ban leh eiei halor ka jingjulor ka mariang kaba la ktah mynta, phi tip ïa ka um bad kiei kiei baroh, mynta ngi hap ban phaikhmat sha ki lad ki lynti ban leh eiei” kala bynrap.
Haba pynpaw ba ka Tnad ka la pyrshang ruh ban pynshlur ïa ki briew ban thung ïa ki soh niamtra Khasi, ka Kong Ampareen kala ong “Phin ym tang ban pynbun ïa ki khlaw ba jyrngam hynrei phi ïoh ruh ïa ka lad kamai na u sohniamtra uba roi bha ha ka thain”.
“Ngi la tip bha ïa ka jingshisha ba bun ki jaka ha Ri-lum Garo ki dei kiba thung ïa ki jingthung organic, kim ju ai dawai ïa ki jingthung, ngi dang pyrshang ban pynseisoh pat ïa ka khyndew” kala bynrap.
Kala pyntip ruh ba ka Tnad ka la pynshlur ruh mynta ïa ki kam pynmih mar jingbam la ka dei na ki soh ne na ki jhur ki jhep.
Ka Myntri kala pynpaw ia ka jingkmen ba ka Ri-lum Jaintia kala pynmih ia ki nongrep kiba la kiew bha bad ong ba kine ki nongrep ki la ïatrei minot bha ïa ka kam.