Nongpoh, Jymmang 02: Ka Dorbar ki Rangbah Shnong Ri-Bhoi District kala pynpaw ka jingsngewkhia halor ka jingkhang ka sorkar ïaka jingtih maw bad shyiap kaba la buh jingeh ïa kiba bun ki paidbah nongshong shnong khamtam ki nongïalam shnong ban pynïaid ïaki kam ki jam bad ki kam pynroi haki shnong ki thaw kumba ki hap ban leit kit ïaki maw bad shyiap naki jaka ba jngai.
Haba ïakren bad u nongthoh khubor u Bah BB Makdoh Chairman ka Dorbar ki Rangbah Shnong u la ong ba kum u nongïalam u dap da ka jingsngewkhia kaba jur halor ka jingud jingnam ki para Rangbah Shnong na kiba bun ki shnong naka jingeh ba ki mad naka daw ka jingbym ioh shyiap bad maw namar ka jingkhang ka sorkar ban tih maw bad shyiap kaba ki paidbah bad ki nongïalam shnong ki hap ban leit kit naki jaka kiba jngai kaba ktah ïaka jinglut jingsep ki paidbah.
U la ong ruh ba bun naki kam pynroi khamtam ka jingpyntrei ïaka skhim MNREGA ka ktah bad sahkut haki shnong ki thaw namar ka jingkhanglad ka sorkar, khamtam ki shnong kiba don sha ki thaiñ nongkyndong bad ktah ïa jinglut jingsep ki paidbah bad kane ka jingkhanglad jong ka sokar kadei ka jingeh kaba khraw ba bun naki paidbah bad ki nongïalam shnong ki mad.
Namar kata naka liang ka Dorbar kala kyrpad sha ka sorkar ba kan thaw ki lad ki lynti kumno ban ailad ïaki paidbah bad ki shnong ban kit ïaki maw bad shyiap ban pynsuk ïaki paidbah bad ki nongïalam shnong ban pyntyllun ïaki kam ki jam.
