Ka nongrim ba ka HSPDP ka ïeng halor ka MoU ka long kum ka jingibeiñ ïa u Bah Hoping: HYC

By Mawphor Editor On May 2, 2022

Shillong, Jymmang, 01: Ka Hynñiewtrep Youths Council (HYC) ha ka sngi u Blei ka la kynthah tyngeh ïa ka Hill State Peoples Democratic Party (HSPDP) ha kaba ïadei bad ka jingsoi jong ka Sorkar Meghalaya bad ka Sorkar Assam ïa ka Memorandum of Understanding (MoU) ban ïapynbeit ïa u pud u sam ha ki hynriew tylli ki jaka ba ïakajia pud ha ka kylla banyngkong.
Kane ka jingkynthah jong ka HYC ka long hadien ba u President jong ka HSPDP u Bah K.P.Pangniang uba long ruh u dkhot jong ka Regional Committee West Khasi Hills u la kren halor kane ka mat ha kawei na ki kot khubor phareng da kaba ong, “ngam ïohi ban don ka jingbakla lane ba ngi duh noh ïa shibun ki jaka. Ban ïoh ïa ka jingmynjur lang, ngi lah hap ban ïa pynbeit hangne hangtai ïa ki jaka.”
“Kitei ki kyntien ki paw shai ba lah don ka jingpynbeit ban ai ei ïa ki jaka ne ki shnong kiba dei hok jong ki Hima Khasi sha Assam watla kitei ki jaka bad ki shnong ki dei kiba la longtrai da ki Hima Khasi bad kiba shong ba sah da ki jaidbynriew Achik bad kiba hap hapoh ka synshar khadar jong ki Hima Khasi. Ka hok longtrai halor ka khyndew ka dang ïaineh bad ïaisah ha ki Hima Khasi haduh mynta,” ong u kyrwoh na ka HYC ba la phah da u General Secretary u Bah Roy Kupar Synrem.
“Ka jingkylli kaba ngi wah ban kylli ïa u Bah Pangniang, mano ba ai bor ïa phi ba phin ïa “adjust” ïa ki jaka kiba ma phi phim dei u trai? Halor kano ka nongrim ba phi shim rai ban ïa “adjust” ïa ki jaka jong ki Hima? Hato kata ka “adjustment” ka dei kawei na ki kyndon ne ki Principle kiba lah ïapynbeit hapdeng ki Sorkar Jylla ha shuwa ban ïaid shakhmat ban pynbeit pud? Ne don eiei shalyndet ban leh ïa katei ka kam namarba kam ïahap katkum ka jinglong jingman (political interest)ha ka Saiñpyrthei ha katei ka dong ka thaiñ ne Konstitwensi?” la buh jingkylli ka Seng.
“Ngi kwah ruh ban tip ba jia aiu hapdeng ka tarik 7-5-2022 bad mynhynnin ka 30-5-22 ïa u Bah Pangniang namarba katkum ka khubor ba mih ha ka 7-5-2022 ha kawei ka Online News, lah pynpaw ba une u juh u Bah Pangniang u President ka HSPDP u la kynthoh tyngeh ïa u Myntri Rangbah ka Jylla namarba ki don ki shnong hapoh West Khasi Hills kiba ju don ha Meghalaya hynrei hadien ka soskular lah pynhap noh ïa ki ha Assam. Kine ki jingleh jong ki nongïalam ka seng HSPDP ba kynthup ïa u President bad u MLA ka Seng uba long ruh u Minister bad ha kajuh ka por u Chairman ka Regional Committee West Khasi Hills, ki pynlong ïa ngi kum ki paidbah ban suba jur ba don eiei shalyndet ha kane ka jingïapynbeit pud namar kine ki briew kim neh ha ka nongrim ba ki kren. Ki kylla ktien na kawei ka por sha kawei ka por bad ki pynpaw ruh ïa ki dak ki shin jong ka jingbakla ha baroh kawei kane ka kam pynbeit pud,” la ong u kyrwoh.
Ka Seng ka pynrem jur ïa kine ki jingleh jong ka Seng HSPDP hapoh ka jingïalam u Bah K. P. Pangniang kum u President bad ïa ka jingbymskhem jingmut jong ki lyngba ki jingkren kiba kylla ktien na kawei ka por sha kawei ka por halor kane ka mat.
“Ngi ngeit skhem ba ki paidbah bad ki nongkyrshan jong ka Seng HSPDP, kiba don bad iengskhem ban kyrshan ïa ka Seng naduh ki por ba lah seng ïa ka, kin pyrkhat bad puson bha hor kine kiei kiei,” bynrap u kyrwoh.
“Ka nongrim ba ka seng HSPDP ka ieng ha kane ka khyllipmat halor ka soskular ïa pynbeit pud, ka long ka “insult” bakhraw ïa i Maieid Hoping, u nongseng ïa ka HSPDP bad ruh ïa baroh ki nongïakhih Hill State ha kato ka por namarba u Maieid Hoping lem bad ki Volunteer ki khlem ïakhih ban pynïoh Jylla lajong khnang ba u Conrad Sangma ha ryngkat ka HSPDP kin lilam ïa ki jaka jong ki Hima Khasi sha Assam. Ka jingïakhih Hill State ka long ban pynïoh ïa ka Jylla bapura katkum u pud u sam ki lai tylli ki ADC kata ka KHADC, ka JHADC bad ka GHADC. U pud u sam ka KHADC ki dei katkum u pud u sam ki Hima Khasi. Haba kumta kumno ka Seng HSPDP kin lah ban ïa peiñ ïa kane ka nongrim ba hakhmat eh bad ïa “adjust” ïa ki jaka jong ki Hima?” kynthoh shuh shuh ka Seng.