Shillong, Iaiong 30 : U Myntri Rangbah ka jylla u Conrad K Sangma u la pynpyiar ïa ka mission rep sying sha ri lum Garo da kaba leit ban plie ïa kane ka mission ha Oragitok, kaba hap hapoh ka Rongram Block, West Garo Hills ha ka Sngi Thohdieng ha ka jingïadon lang u MLA u Thomas A Sangma bad ki ophisar.
ïa kane ka prokram ba kyrpang jongka sorkar jylla la pyntreikam da ka jingbuh thong ban kyntiew ïa ka jingrep bad pynmih sying ha ka jylla bad lyngba kane kan ai jingmyntoi ym duna ïa ka 40 hajar ngut ki nongrep hapoh ka jylla.
Haba kren sha ki nongrep u Myntri Rangbah ula ïathuh ba ka sorkar ka la mang 121 klur na ka bynta kane ka mission ha kine ki lai snem ban wan ka ban kynthup ïa ka jingshna ïa ki jaka ban pynmih shibun ki jingpyndokam na u sying, ka jingai jinghikai bad kumjuh ruh kumno ban pynïaid ïew na kiei kiba la pynmih na u sying.
U la ong ka thong ba hakhmat eh jongka sorkar ka long ban kyntiew ïa ka jingpynmih ïa u sying na ka 60 MT sha ka 150 MT ha ka shisnem shisnem ha kine ki lai snem ban wan bad ban pynthikna ruh ba ka jylla Meghalaya ka dei ka jylla kaba pynmih bun eh ïa u sying ha ka ri baroh kawei.
U la ïathuh ba ka sorkar jylla ka la pyntrei ïa kiba bun ki prokram na ka bynta ka jingkiew shaphrang ki nongrep. La pyntreikam ïa ka mission ri sniang, mission thung sohphan, mission ri syiar, ri blang, ri dohkha bad ter ter. La ïarap ban kyntiew ïa ki SHG bad khamtam kawei na ki prokram ba heh ka dei ka FOCUS.
U la ïathuh ruh ba ha kine ki saw snem lyngba kine ki prokram bapher bapher ka sorkar ka la pynlut ym duna ïa ka 1000 klur tyngka. “ Na ka bynta ban pyntreikam hok ïa ka pisa bad skhim, ngi donkam ban pynthikna ba ki nongrep ki dei ban ïoh jingpynshai kaba sani bha shaphang kine ki prokram bad ba ki dei ruh ban shim kabu ïa kine ki prokram da kaba thaw ïa ki Cooperative Society, ki SHG, ki Producer Group” ong u myntri rangbah.
Shuh shuh u la pyntip ba ka jylla ka don ym duna ïa 4.5 lak ngut ki nongrep bad kan long kaba eh ïa ki tnad sorkar ban poi shaki kumta u la kyntu ïa ki nongrep, ïa ki seng nongrep ban wan shakhmat bad thaw ïa kine ki Cooperative bad ki Multi Purpose Society. Ha katei ka sngi ula sam ruh ïa ki cheques kumba 27.60 lak sha ki 40 tylli ki Producers Group. La ïathuh haduh mynta ki don 287 tylli ki Producer Group kiba kynthup ïa ki 1876 tylli ki long ïing. Tang ha Rongram Block la dep sam kumba 1.8 klur sha ki nongrep. Ha kane ka sngi u la sam ruh ïa ki ksing ngap sha ki nongrep lyngba ka Apiculture Mission.
