Tura, Jylliew 25 : Kum ka dak ban pynsngewthuh sha ki paidbah ïa ka jingshyrkhei jong ka jingwan tuid u drok sha ka jylla bad ka jingnang jyllei ki nongdih drok, ki bor pynïaid district jongka West Garo Hills District ki la rai ban rakhe ïa ka sngi ban ym shah pynsawa Hon kali ha ka 26 tarik Jylliew 2023 naduh ka por 8 baje mynstep haduh ka por 4 baje janmiet. Kane ka long ruh kum ka jingpynthynda bad jingpynjai jai ïa ki sawdong sawkun ka mariang.
ïa kane ka hukum la pynmih da u Deputy Commissioner ka West Garo Hills kaba la kren ba ïa kane ka sngi la rakhe ban pynsngewthuh sha ki paidbah halor ka jingshyrkhei jong u drok bad ka jingjur jongka jingpynrung ne khaïi beaiñ ïa u drok shapoh ka jylla. Kumta kum ki nongshong shnong kiba don ka jingkitkhlieh dei ban wanrah bad pynlong ïa ka jylla kaba lait na u drok bad kaba don ruh hapdeng ka jingshongsuk shongsaiñ.
Naduh ka por 8 baje mynstep haduh ka por 4 baje janmiet ym shah pynsawa Hon ha baroh kawei ka district lait noh tang ki jingdonkam ba kyrkieh kata ban ai hon ban ïohsngew ki briew ban lait na ka jingmynsaw. Ki pulit kin peitngor bha ïa ka rukom pynsawa hon baroh kitei ki kynta bad ïa kiba pynkheiñ yn daiñ kuna.
Kiba lah ban pyndonkam ki long tang ki Ambulance, ki fire brigade, ki bor pulit. Ka jingthmu ka long ban pynlong ïa ki paidbah ba kin sngewthuh haduh katno ka jingshyrkhei jongu drok bad kumno ban ïaleh pyrshah ban pynlong ïa ka jylla kaba lait na u drok. Kumta ki bor synshar district ki kyntu ïa baroh ban ïatrei lang khnang ba ka jingthmu kan long kaba jop.
