Jowai, Jylliew 23: Ka Hynñiewtrep National Movement (HNYM) West Jaiñtia Hills District mynta ka sngi Thohdieng hapoh ka jingïalam u President ka seng u Pynhun Shulet ha ka jing ïadon lang u Waheh Shnong ka Ialong u bah T. Ram Phawa bad ki dkhot ka seng, ki la leit ïa kynduh ïa ka Medical Supritendent(MS) jong ka Jowai Civil Hospital Ialong.
Ha kane ka jingleit ïa kynduh ka seng ïaka Medical Superintendent ka long hadien ba ka seng ka la ïoh jingujor na kiba bun ki paidbah ha kaba ïadei bad ka jingkren heh jong ki Nongtrei (Staff) jong katei ka Hospital bad bun ki jingduna hapoh katei ka Hospital.
Ka seng ha ryngkat u Waheh Shnong ki la dawa na ka MS jong katei ka hospital ba ka dei ban shna noh da ka side drain haba dei bad ka General waste jong katei ka hospital namar ba ki jakhlia ba mih na katei ka General waste ka la ïaid lyngba u surok najan katei ka Hospital .
Shuh shuh ka seng ka ong ba ka jingtuid ki um ba mih na ka jakhlia ba wan na katei ka Hospital ka lah ban wanrah shibun ki jingpang ïa ki paidbah ka jylla baroh kawei, kumta ka seng ka la kyrpad ruh ïa ka MS ba kin plie noh ïa ka gate ba nadien jong ka hospital ban rung bad mih khnang ban lait ka jingkhap ngiah na ka jaka rung sha katei ka hospital.
La dawa ruh ïa ka M.S ba kin pyntrei kam noh shi syndon ïa ka Police Booth hapoh ka tei ka Hospital bad na ka liang ka M.S ka la ong ba ïa ka Police Booth la dep ban shna sah sa tang naka liang jong ka tnad Police ban phah briew noh hapoh ka tei ka Police Booth, ka seng ka kyntu ruh ïa ka M.S ba ka dei ban kyntu ïa ki Nongtrei (staff) ba kin long ki ba jai jai ha ka ktien ka thylliej.
Na ka liang jong u Waheh shnong ruh u la kyntu ïa ka MS jong ka Jowai Civil Hospital Ialong ba kin nym bret pathar ïa ki nuit ha kylleng ki jaka ba marjan jong ka Hospital bad ula kyntu ïa ki Staff jong katei ka hospital ba kin long ki ba jai jai ha ka kren bad ki nongpang bad na ka liang u Waheh Shnong ula ong ba ha ka jin shisha ka long ka jing kyrkhu ïa ki paidbah jong ka thaiñ ba ki la don 2 tylli ki hospital hapoh ka District ka MCH bad JCH hynrei ka jingdkoh trei kam ka Hospital ka long pynban ka jing tim ïa ka hospital bad na ka liang jong u Waheh shnong u la ong ba lada ka Hospital kam lah ban trei kam tikna naka liang u Waheh Shnong bad ka Seng kan leit khang tala noh shwa ïa kane ka Hospital.
