San sngi shongdum ki 3 tylli ki shnong ha East Jaiñtia

Khliehriat, Jylliew 18: Ki lai tylli ki shong hapoh East Jaintia Hills District ki la shongdum la palat ïa ka san sngi lynter bad na ka liang nongshong shnong katei ka shnong ki la ïathuh ba ka daw tynrai jong ka jingduh bording ka dei namar u SDO ba dei peit ïa ka Lumshnong Sub- Station um shym la shimkhia eiei ban weng ïa kane ka jingeh wat hadien ba ki la leit ud leit nam sha u.
Kine ki lai tylli ki mshnong kiba duh bording la jan kot sha ka shitaïew ki kynthup ïa ka Nongsning ka shnong ba don 120 eiei ki longiing, ka Umrasong pat kaba don 50 tylli eiei bad ka Menkre kaba don 100 tylli eiei ki longiing.
Haba kren bad u Mawphor uwei na ki nongshong shnong katei ka u Maniwel Suja u la ïathuh ba kane ka jingduhlait kam dei shuh ka sien kaba nyngkong ne ba ar hynrei ka dei kaba jia man ka por. U la ïathuh ba kine ki shnong kidei kiba ïoh bording na Khlieh-shnong Sub-station.
“Ha shuwa kine ki 10 snem eiei ha ka por ba ki pynpoi bording na Byndihati Substation ka jingpynpoi bording ka biang beit bad kam ju don jingthut kumba long ha kine ki 10 snem naduh ba la pynpoi bording na Khlieh-shnong Sub-station bad kum ki nongshong shnong ngi kwah ba ka jingpynpoi bording kan long biang noh na Byndihati,” u la ong.
U la ong ruh ba na ka liang u SDO ruh wat hadien ka jingujor um shym la shim kino kino ki sienjam ban weng ïa kane ka jingeh bad ong ba ha ki snem ba ka jingtan bording ka dei na Byndihati Substation na ka liang ki nongtrei bad ki ophisar tang shu ai ki jingujor ki pyrshang kloi katba lah ban weng ïa ka jingbym poi bording.
U la ïathuh ruh ba ka jingthung ka sorkar ïa ki Muster Roll tang uwei ban peit ïa ki byun tylli ki shnong ka buh jingeh shikatdei ïa ki ban ai jingshakri kaba paka.
“Ngi dawa ba dei ban pynduna bai bording na bynta kane ka jingbym poi bording namar shane ka baibording la shu antad beit na ophis ym kum shawei ba ki buh da ki meter,” u la ong.
“Sha kiwei ki jaka lehse lada lip bording ka bai lait kan kham duna katba ha kine ki shnong kiba shane pat la shu antad beit la lip ne ym lip bodring ka bai thang bording ka long beit katjuh,” u la bynrap.